Na mesa di redaccion di Bon Dia Aruba a yega informacion tocante mal contento cu algun ciudadano tin pa loke ta trata Hospital Dr. Horacio Oduber, indicando cu ta existi bullying di parti di e director di hospital. Segun e informacion mes, e director tambe ta terorisa dokternan Arubiano te cu hasta nan ta tuma nan retiro pa no paga nan e pakete cu nan merece.

“Si esaki ta e tactica pa scapa placa y ‘bezuinig’ manera Hulanda kier, ta algo hopi malo pa nos pais. Bo por imagina bo mes cu awor di 7 ginecologo cu tabatin, 2 so a resta, cu e director den su estado narcisista a terorisa nan pa bay? Y cu e ta haya normal cu bo tin cu warda 10 luna pa haya ayudo? Anto bisa den corant pa tin pasenshi? Wow! Unda e hunta di supervision di HOH a keda?” e informacion cu Bon Dia Aruba a haya di forma anonimo ta indica.

Tambe den informacion obteni a bin dilanti e pregunta di pakico nan ta acepta e tipo di barbaridad aki y ni un hende di parlamento ta bisa nada of puntra minister di Salud Dangui Oduber. “Con ta posibel cu tin un lista di espera di 10 luna pa internista? Hunta di supervision ta supose di laga minister Oduber sa kico ta sucediendo den hospital y pakico e hendenan aki ta keda keto mientras tur siman tin vacatura nobo pa specialista, siendo cu ta core cu nos specialistanan, pero si tin placa pa paga 12.000 euro pa un waarnemer di ginecologo di Hulanda? Pakico tin miedo di [e director]?”

Pa finalisa, nan ta señala cu ta bon pa cuminsa un investigacion pa wak kico ta pasando den hospital “unda nan ta yuda bo muri mas lihe, pa scapa placa di blijkbaar.”

Ta importante pa menciona cu den mesun linea aki, Bon Dia Aruba den su edicion di dia 9 di augustus a publica un articulo cu e headline “Anestesiologo Ike Posner ta lamenta retiro di Dr Babet Latour Lamers pa atakenan personal y profesional” na unda cu e anestesiologo Posner mediante varios post riba Facebook, a lamenta cu “Aruba ta perde un briyante strea di atencion medico.” Esaki pa motibo di retiro di specialista den oncologia ginecologico, Dr. Babet Latour-Lames.

“Como anestesiologo, mi tabatin e privilegio di traha den estrecho colaboracion cu Dr. Babet Latour-Lamers. Frecuentemente nos tabata traha te den oranan laat di anochi, banda di otro, pa scapa bida di mama y muchanan. Na momentonan asina critico, e esencia di un profesional ta bira cla, y esun di Dr. Babet tabata nada menos cu excepcional y tambe a destaca cu casa di Dr. Babet ta Vincent Latour, un medico forense di zeden politie pa menornan di edad na Aruba. Como unico medico forense, Aruba tambe ta perd’e.

Alabes, Posner a expresa critica pa e directiva di HOH den un otro post, bisando:
“E hunta di supervision ta comparti responsabilidad pa mal maneho na hospital. Si nan no eherce supervision adecuado riba e hunta ehecutivo, nan tambe tin un rol den e mal maneho. Si esaki ta pa motibo di indiferencia of incompetencia ta depende riba e circunstancianan specifico di e decisionnan dentro di e organisacion. E hecho cu Aruba ta bin sufriendo cu cuido ginecologico y obstetrico inadecua pa un periodo significante ta inaceptabel.” E ta reitera su opinion cu HOH “ta core cu ginecologonan.”

Di su parti, Hospital Horacio Oduber (HOH) a traves di un comunicado di prensa di e luna aki a pidi comprension di comunidad, ya cu “ultimo tempo team di policlinica Ginecologia ta pasando den momentonan di escasez y awo e tin un efecto grandi riba e team completo y tambe riba cuido di pashent.”

“Seguridad di nos empleadonan ta hopi importante banda di cumpli cu nos vision como organisacion. Nos kier pa pashent haya e cuido cu nan merece pero no mester lubida pa keda cu respet mutuo,” HOH a bisa.

Si tin informacion riba e topico aki cu kier comparti anonimamente cu Bon Dia Aruba, por tuma contacto via nos e-mail noticia@bondia.com of riba telefon 582-7800.