Pa lider di fraccion di AVP, Marlon , e discurso duna pa Gobernador di Aruba, Alfonso Boekhoudt y traha pa Gobierno den cuadro di Aña Parlamentario nobo (2019-2020), tabata uno ‘bashi y sin contenido’ riba kico ta spera nos comunidad pa 2020.

Pa Sneek, un discurso di Gobernador mester duna un refleho di kico ta spera pueblo, entre otro riba e ley di presupuesto 2020, y kico ta e cambionan di e reforma fiscal y kico lo pasa cune. “Bo no ta haya sigur for di e discurso aki kico ta e linea cu e gobierno aki lo bay hiba”, el a declara.

E Parlamentario a referi cu den e discurso lesa pa Gobernador, nan por a scucha cu haci deporte ta sano, pero nada di contenido di kico ta e aporte cu Gobierno ta bay duna pa garantisa esaki. Esaki simplemente pa menciona un aspecto, p’esey e ta categorisa e discurso di Gobernador como uno basta bashi, sin un bista real di kico lo spera nos comunidad den 2020.

Pa e aña parlamentario nobo, fraccion di AVP den oposicion y cu 9 miembro lo sigui controla e parti di salubridad publico, economia y e di dos pilar economico cu ta Citgo. Sneek a bisa cu den e discurso di Gobernador a menciona 6 punto di e plan economico di gobierno, entre otro economia circular. Mientras cu e mesun hende hinca den esaki ta bezig cu un destaho publico pa bin cu un insinerado pa kima sushi, y esaki realmente no ta economia circular. P’esey e ta haya cu e discurso aki tabata bruha.

Encuanto nan decision pa bandona sala di Parlamento durante e ultimo reunion pa trata e prome seis luna di e presupuesto, y si nan lo sigui hacie, lider di fraccion a bisa cu nan posicion a keda mesun cos. “Nos no ta participa na show” pa crea e impresion cu nan ta controla, categoricamente el a bisa.

El a agrega cu den e reunion aki, e Minister mas importante tabata esun di finansa, ora e reunion aki a caba, e mandatario di finansa no tabata presente. Es mas, cuater di e ocho Ministernan no tabata presente. Nan como fraccion den oposicion kier participa den reunion constructivo, unda nan por aporta tambe.

E ta argumenta cu un punto tabata e rapport di e colegio di supervision CAft, cu a sali y cu nan a pidi pa atende den e reunion aki. Pues e ta haya cu e preocupacion cu nan tabatin ta wordo refleha bek den e posicion di gobierno di no atende cu e asunto di personal. Tampoco gobierno no ta atende cu asunto di entrada manera ta wordo stipula den e presupuesto, manera CAft ta señala.

 

LEAVE A REPLY

Please enter your comment!
Please enter your name here