Lider di fraccion di MEP, Rocco Tjon, despues di scucha Gobernador di Aruba, Alfonso Boekhoudt su discurso traha pa gobierno den cuadro di aña parlamentario nobo, a declara na Bon Dia Aruba cu e ta totalmente di acuerdo cu Presidente di Parlamento, Ady Thijsen, cu e tabata un discurso ‘hopi elocuente’.

Un discurso cu -segun Tjon- ta pone bo reflexiona riba diferente punto. El a gusta e inicio di e discurso caminda a enfatisa e parti di fortalecemento di democracia den un estado di derecho. Tambe e ta haya cu e tabata un discurso ‘hopi bon’ cu a toca diferente aspecto di maneho di cada ministerio di e gabinete Wever-Croes.

Igualmente na final di su discurso, Gobernador a haci un apelacion na e Parlamentarionan pa e debate cu nan ta hiba por ta uno riba nivel y respet. “Esey riba su mes caba lo percura pa eleva y hiba nos pais pa dilanti”, el a bisa.

Pa e aña parlamentario, lider di fraccion di MEP ta premira cu un topico cu ta hopi actual pa atende cune ta e retonan financiero. Pa loke ta e presupuesto y e normanan di e protocol firma cu Hulanda, nan ta para fuerte tras di e normanan cu gobierno kier logra.

E Sugar Tax ta un punto actual y nan ta deliberando cu gobierno. Tambe ta pendiente e Ley di Serlimar y tambe esunnan cu tin di haber cu supervision financiero of LAft. Ademas nan a yega di presenta un ley di iniciativa pa loke ta ‘roekeloos rijden’, pa asina eleva siguridad den trafico.

Tjon a bisa cu den e clausura di e aña parlamentario 2018-2019, nan a yega di trece dilanti cu nan a conoce hopi reto, entre nan financiero y economico. Pero tambe retonan constitucional. Como fraccion di MEP di nuebe miembro den coalicion di gobierno cu partido RED y POR, nan kier haci nan trabou pa yuda pais Aruba pa surpasa e retonan aki.

“Mi ta kere cu como fraccion nos ta tuma nos trabou na serio”, el a bisa.

E ta haya cu como fraccion di MEP nan tabata kende a haci mas hopi pregunta na gobierno y e actitud aki ta refleha cu nan ta un fraccion critico y nan lo sigui den e mesun linea durante e aña parlamentario nobo aki. No solamente nan ta controla pero nan ta proactivo den e buskeda di solucion pa e retonan financiero y economico di nos pais.

Tambe e tres comision cu a reuni mas tanto den e aña Parlamentario anterior, tabata esun di asuntonan di reino, husticia y finansa, tur tres presidi pa fraccion di MEP, el a laga sa. E ta haya cu e balans aki ta positivo.

 

 

LEAVE A REPLY

Please enter your comment!
Please enter your name here