Mexico lo bay ta autosuficiente den su necesidadnan di gasolin pa mita di aña 2022, ora Gobierno ta spera lo finalisa e construccion di un refineria nobo di empresa estatal Pemex, presidente Andrés Manuel López Obrador a bisa ayera.
E declaracionnan di e mandatario ayega un dia despues cu Gobierno a declara cu a bandona un licitacion pa traha e obra den zona di Tabasco, sigurando cu e firmanan invita a surpasa e presupuesto y e plaso di su proposicionnan.
“Nos lo bay ta autosuficente den produccion di gasolin na mei di 2022”, López Obrador a sostene.
E desaroyo y administracion di e instalacion lo ta na cargo di e estatal Pemex y Secretaria di energia, loke segun analistanan y agencia calificado ta pone presion riba e finansa di e petrolero di e pais.
Analistanan di e sector a sugeri cu un tempo di tres aña pa completa e proyecto ta optimista, pero e presidente a reafirma e obhetivo durante su conferencia di prensa.
Mexico a bira cada biaha mas dependiente di importacion di combustibel, pa via cu e produccion di e refineria Pemex a cay debi na problemanan anterior, manera retraso pa mantencion y accidente. Esey a obliga e empresa pa exporta cerca di 600.000 bari pa dia (bpd) e aña pasa.
López Obrador, un nacionalista di energia, a gana su eleccion e aña pasa y a priminti libera Mexico di importacion di combustibel y produci mas na cas. E mandatario a agrega cu e refineria nobo Dos Bocas lo conta cu un capacidad di procesamento di crudo di 300.000 bpd.
