Minister di Educacion, Ciencia y Desaroyo Sostenibel, Armando Lampe a declara na Bon Dia Aruba cu e acto conmemorativo dilanti di bestuurskantoor en conexion cu 75 aña di ONU, el a participa den dje, ya cu e ta minister responsabel pa Unesco cu ta un organisacion di Nacionnan Uni.

Si ONU a surgi pa establece paz mundial despues di II Guera Mundial, minister Lampe ta haya cu aworaki den 2020, “nos ta enfrentando otro guera mundial.” E guera aki ta entre humanidad y naturalesa. El a agrega cu e mesun pandemia di Coronavirus cu mundo henter ta sufriendo di dje, ta un expresion di e desbalans cu a bin entre medio ambiente y ser humano. El a laga sa cu e ta un virus invisibel, pero cu a pone nacionnan poderoso na rudia.

Un muestra di esaki ta e crisis climatico of calentamento global. Pues e ta mira cu tur esaki ta un degradacion di un desbalans, y p’esey a surgi e SDGs di ONU. Nan a bin cu e metanan aki pa henter humanidad por uni rond di nan pasobra nos no por sigui den e relacion aki di explotacion di medio ambiente.

Enseñansa y SDGs

Enseñansa di Calidad ta e di cuater menta cu Nacionnan Uni (ONU) a contempla den cuadro di e 17 metanan di Sustainable Development Goals (SDGs).

En conexion cu e di 75 aña di existencia di ONU, minister Lampe a declara na e matutino aki cu e SDGs 2030 ta pa reestablece e relacion di harmonia entre naturalesa y humanidad.

“Pasobra si nos no ta haci’e, bida humano no ta posibel den futuro riba e planeta aki,” el a expresa. Y e ta haya cu e caminda pa cuminsa atende cu e situacion aki ta den enseñansa pa e muchanan pa percura desaroyo sostenibel, y respet pa naturalesa.

Lampe a bisa cu su programa, esta Plan Educacion Nacional (PEN) 2030 ta stipula e maneho di 10 aña cu el a ‘decreta pa goberna Aruba for di ministerio di Educacion.’ E meta di e plan aki ta pa nos ta den e mesun linea di SDGs.

E mandatario a bisa cu ora e ta den forum internacional semper e ta expresa cu Aruba ta un ehempel pa otro paisnan. Un punto ta cu su ministerio ta yama Ministerio di Educacion, Ciencia y Desaroyo Sostenibel. Pues algo cu no tur pais tin’e ya cu a uni educacion y desaroyo sostenibel pa asina educa nos futuro generacion pa por sobrevivi den mundo di futuro. Pa logra esaki nan mester “un relacion di respet pa naturalesa.”

Sistema escolar y naturalesa

El a declara cu su ministerio ta bezig cu nos sistema escolar pa establece green house, caminda nan ta siña e muchanan kico ta plantacion y su desaroyo for di e simia te na fruta. E ta haya cu e ta un forma pedagogico pa inculca e muchanan e respet pa naturalesa.

Tambe den e luna aki nan ta trahando cu e muchanan tocante e pintura rond di nan mascota of cacho di cas. E ta un manera pa siña e muchanan for di chikito cu un animal ta parti di e famia. Pues e ta haya cu e respet tanto pa mata, planta y bestianan ta yuda e generacion nobo cu ta creciendo cu nos ta un famia, y un bida tin cu nos mester respeta bida.

 

LEAVE A REPLY

Please enter your comment!
Please enter your name here