Diamars mainta Parlamento di Aruba a aproba unanimamente e ley “Landsverordening tot wijziging van de Landsverordening beperking tabaksproducten”. Minister di Salud Publico, Sr. Dangui Oduber a duna splicacion amplio di e ley y tambe a contesta preguntanan di otro coleganan di parlamento.

E ley aki ta forma parti di e Plan Nacional di Prevencion pa maneha cu e NCD’s nan, e malesanan cronico. Manera a keda presenta pa varios parlamentario, un di e preocupacionnan mas grandi ta e efectonan negativo cu humamento y e uso di productonan cu nicotina tin pa salud, manera entre otro cancer, presion halto, stroke, infarto y dolor na pecho.

Cambionan cu a wordo haci na e ley nobo, cu lo drenta na vigor 1 di januari of 1 di februari di aña 2022 ya lo siguiente:

• Aumento di e edad pa cumpra sigaria di 18 aña pa 21 aña. Esaki ta debi na un estudio cu a wordo haci pa World Health Organization (WHO) unda ta mustra cu aumentando esaki ta baha e

probabilidad cu un hoben ta cuminsa na huma sigaria.

• Ta prohibi tambe e benta di sigaria los. Den cuadro di esaki Gobierno lo bay sinta hunto cu e

Asociacion di Chines pa splicanan e plan di prevencion cu Gobierno tin.

• Prohibi humamento den areanan publico, incluyendo na scolnan.

• Prohibi persona adulto y/of mayornan cu ta huma den auto den compania di menornan di edad.

Minister Oduber a expresa su satisfaccion cu e aporte y preguntanan ricibi di parti di e otro parlamentarionan, y tambe cu e compartimento di e preocupacion di e consecuencianan di e humamento di sigaria. E ley aki tabata un iniciativa di Sr. Marlon Sneek, ex-miembro di parlamento di fraccion di AVP. E ley a wordo aproba y aworaki Minister Oduber a wak e necesidad pa modernisa y trece cambionan necesario pa implementa e ley aki.

Minister Oduber a ricibi varios pregunta ariba e ley aki for di diferente miembronan di Parlamento. Sr. Marco Berlis di fraccion di MEP puntra con lo haci pa atende cu e fenomeno di e-cigarettes y e-vaping bao di e ley aki, mirando cu e un fenomeno nobo y cu ta wordo usa hopi na Aruba. Minister Oduber a splica cu e ley aki ta atende cu productonan di tabaco y esaki tambe ta inclui e-cigarettes y e-vaping. Segun el a indica e ley aki ta uno hopi dinamico cu den futuro facilmente lo por haci adaptacionnan pa atende cu e fenomeno aki cu ta mes, of mas malo, cu e productonan cu sigaria tin.

Ariba e pregunta di control, el a splica cu Departamento di Salud Publico ta encarga cu e control y tin un unidad cu ta sali ariba caya caba pa controla establecimentonan ariba higiena.

Pa locual ta trata control di vehiculonan y espacionan publico, el a splica cu polisnan lo haci control ariba vehiculonan ariba caya y si tin un mayor edad humando den compania di un menor di edad lo tin boet pa esaki. El a indica tambe cu un di e retonan mas grandi ta keda escasez di personal y fondonan.

Varios miembro di parlamento a haci e pregunta na Minister Oduber ariba cua estudionan e ley aki ta basa. El a splica cu Sr. Sneek a basa su mes ariba estudionan cu a wordo haci na aña 2012 y a base di e estudio ey, Departamento di Salud Publico a haci un estudio tambe, pero el a indica cu e intencion ta pa den aña 2022 nan haci un estudio nobo pasobra e prome estudio ta hopi anticua.

Panamerican Health Association lo asisti pa haci un estudio completamente nobo ariba e uso di productonan di tabaco den e comunidad di Aruba, y consecuentemente kico ta e efectonan pa e salud, e malesanan cronico pa e ciudadanonan.

Parlamentario Sra. Mervin Wyatt-Ras a puntra cuanto di e personanan cu a fayece den e ultimo aña y mey, ki porcentahe a fayece pa motibo di problemanan di pulmon, y segun Minister Oduber a señala, durante e ultimo un aña y seis luna, durante e pandemia, 90% di casonan di persona cu a fayece tabata pa complicacionnan y problemanan di pulmon.

Un di e cambionan den e ley ta e aumento di edad pa compra di sigaria, y Sra. Wyatt-Ras a puntra con ta bay controla edad ora di cumpra sigaria y ken su responsabilidad e lo ta.

Minister Oduber a splica cu conforme e ley e responsabilidad ta keda di e establecimento cu pa medio di un verplichte ID plicht lo pidi tur persona cu ta cumpra sigaria un ID valido.

Sra. Wyatt-Ras tambe a presenta e pregunta ariba e topico di uso di cannabis medicinal. Segun Minister Oduber a indica na e momentonan aki e uso di e producto mencion ta prohibi ainda. Locual cu a wordo a aproba na december di aña 2020 ta importacion di productonan di CBD y tambe azeta, crema y capsula cu no tin un contenido mas halto cu 0.2% di THC.

Parlamentario Sr. Arthur Vallejo a puntra si e ley aki ta abarca productonan di nicotina sintetico, ariba cual Minister Oduber a enfatisa un biaha mas cu e ley aki ta uno hopi dinamico y si yega e momento pa adapta e ley pa abarca productonan sintetico di nicotina, lo haci esaki.

Minister Oduber a splica tambe cu un di e preocupacionnan mas grandi di parti di e casinonan tabata kico lo bay pasa cu clientenan di casino cu ta huma ora cu e ley wordo aproba unda cu el a splica cu nan a informa tur e casinonan di e ley aki c tempo pa asina nan haci e cambionan necesario cu ta bay acorde cu e ley nobo.

Den e mesun liña Parlamentario Sra. Gerlien Croes tambe a referi na e consecuencia financiero pa negoshinan y Minister Oduber a splica cu nan ta consciente di e consecuencia aki tambe pero naturalmente salud ta bin na prome luga y esaki tabata e punto di salida ora cu e ley a wordo presenta y aworaki cu el a wordo adapta y modernisa. El a indica cu nan a tene consideracion cu tur e comerciantenan y p’esey nan a wordo inclui den e proceso di preparacion di e ley aki pa tur hende ta bon informa di kico ta e cambionan y posibel consecuencianan.

Pa loke ta trata e fondonan necesario pa campañanan di concientisacion, mirandPanamerican o e situacion financiero di pais Aruba, Minister Oduber a splica cu Panamerican Health Association ta pone fondonan disponibel pa Aruba pa diferente campañanan di concientisacion y tambe pa estudionan cu mester wordo haci

Cu esaki Ministerio di Salud Publico kier pa mayornan y docentenan enfatisa mas ariba e efecto di uso di tabaco entre e hobennan. E ley aki ta specialmente pa proteha mucha- y hobennan pa evita cu nan ta wordo converti den un humado pasivo cu consecuencia pa aumento infeccion na horea, aumento pa crisis asmatico, aumento di riesgo pa bronchitis y pneumonia y tambe aumento di sintomanan respiratorio.

LEAVE A REPLY

Please enter your comment!
Please enter your name here