Segun minister Dangui Oduber: “No ta nada ilegal nos a haci…”

“No ta nada ilegal nos a haci. E no ta nada inusual nos a haci,” asina minister di Salubridad Publico a reacciona riba e noticia relaciona cu e nombramento di personal cu tabata traha den su mesun oficina den departamento di Salubridad Publico (DVG). Nan a wordo reubica cu un contracto di 5 aña na DVG pa brinda e servicio di transportacion di pashentnan di dialisis.

El a bisa cu ta importante pa clarifica e situacion aki pa no crea duda ni speculacion. E mandatario a reacciona bisando cu a para bira na Aruba cu niun hende bo no por nombra. Mientras cu na final di dia e ta haya cu den un comunidad chikito ken cu bo nombra ta sea bo amigo, bo famia of un conoci di bo.

Segun minister Dangui Oduber, e situacion aki ta conta pa e gobierno aki, pero tambe pa e gobierno anterior, y te hasta e ta conta pa cualkier futuro gobierno. “Pasobra den un comunidad chikito un minister ta conoce hopi hende…” el a declara.

E ta lamenta di e tipo di insinuacion cu ta wordo crea rond di algo asina como si fuera cu gobierno ta actuando ilegal y contra regla di bon gobernacion of cu gobierno no ta integro. Pasobra den e caso aki nan a percura pa tin transporte den tur momento pa e pashentnan cu ta dialisa. P’esey nan ta para firme pa e decision cu nan a wordo tuma, ya cu e ta wak cu gobierno a haci lo corecto.

Transporte di cuido

El a declara cu e situacion aki a presenta casi na comienso di mei, ora cu gobierno a haya instruccion di gobierno Hulandes pa corta gasto di AZV cu 5 miyon pa luna. Y a base di ehercicio haci pa AZV, un aspecto cu nan a considera pa baha gasto ta e transporte di cuido. E servicio aki no ta algo cu un asegurado di AZV tin derecho riba dje conforme e mesun ley di AZV.

Segun e mandatario, AZV a informa su ministerio cu nan ta bay kibra e contrato cu e compania di transporte. Esaki ta trece cune cu e pashentnan cu mester dialisa tres bes pa siman y cu nan no tin transporte, ta keda sin e servicio aki. El a splica cu como gobierno nan tabatin dos escogencia. Un di nan tabata den practica laga e pashent sin e servicio aki. Particularmente e pashentnan cu a demostra cu no tabatin acceso pa transporte pa dialisa, ya sea na Imsan of hospital, debi na diferente motibo.

Pero e ta haya cu si nan a kies e opcion aki e consecuencia tabata pa e pashentnan, ya cu nan tabata keda sin haya e tratamento aki. E otro opcion, cu ta esun cu nan a scoge, tabata pa busca un solucion.

E no ta kere cu ta un secreto publico, y tampoco nada nobo ya cu for di 22 di juni caba, nan a anuncia publicamente cu gobierno lo tuma over e servicio aki di transporte. Considerando cu AZV mes a indica gobierno cu esaki no tabata un derecho di e aseguradonan hancra pa ley.

Mirando cu un grupo di pashent ta keda sin transporte y pa gobierno evita cu nan por core risico cu nan por fayece, nan a busca e “solucion di mas practico.” Pues e minister ta haya cu nan a haci lo corecto pa asina tur momento garantisa cu e pashentnan aki tin transporte tres biaha pa siman.

Payroll

E mandatario a bisa cu den e caso aki nan por a tuma un decision cu ta aumenta gasto di gobierno di busca personal extra pa e departamento aki. Nan por a busca facilmente mirando e cantidad di hende sin trabao, 10 hende pafo di gobierno y cu nan no ta den payroll di gobierno y ubica nan den unit ouderenzorg of departamento di cuido di anciano di DVG.

Pero nan a opta pa ubica personal cu ya caba nan tabatin riba payroll di gobierno. A reubica nan den e unidad aki di DVG sin niun beneficio adicional pa nan por garantisa e transporte pa e pashent di dialisis y garantisa continuidad den e servicio cu tabata wordo brinda, asina el a bisa.

P’esey nan a scoge pa e servicio aki por wordo duna pa e unidad di cuido di anciano di AZV. E ta un unidad existente -segun e mandatario- den e departamento di Salubridad Publico. E ta un unidad cu den cierto situacion caba ta transporta pashent cu mester di cuido y cu no tin transporte.

“Na niun momento nos a aumenta gasto pa gobierno, al contrario nos a baha gasto…” El a laga sa cu e compania di transporte cu tabata brinda e servicio na AZV pa transporta e pashentnan aki su contracto a wordo kibra, pero despues a bin resulta cu AZV a prolong’e y nan ta cobra un tarifa pa ora, cu ta costa pais Aruba mas placa. Esaki compara cu e servicio cu DVG su unit ouderenzorg a tuma over. Segun e mandatario, esaki ta un motibo cu nan a tuma e decision ey pa evita di aumenta niun gasto pa gobierno y garantisa e transporte aki.

Formatierapport

Encuanto si tene cuenta prome cu nan a firma e contract di e grupo persona pa 5 aña cu e plan di formacion di DVG, segun e mandatario, DVG nunca tabatin un formatierapport. Pero e ta sinti cu diripiente formatierapport a bira un discusion.

Te hasta el a bisa cu tempo cu a nombra un director cu no ta gewoon un empleado, no tabatin un formatierapport. Pero awor e ta wak cu pa prome biaha DVG ta bay tin un formatierapport cu ya caba nan a formalisa y el a bay DRH (Departamento di Recurso Humano,) despues cu nan a sinta cu tur empleadonan y nan ta wardando pa e yega su ministerio pa nan por aprob’e den conseho di minister.

E ta haya cu masha hende mes a wordo aloca den DVG sin cu tabatin prome un formatierapport. Pero awe cu cinco empleado a bay na e unidad di transporte di DVG pa ‘scapa bida di hende’ awor formatierapport a bira un discusion, segun e mandatario.

Igualmente el a agrega cu e team cu ta percura pa transporta e pashentnan di dialisis ta “haciendo un excelente trabou.” E minister a sigura cu e pashentnan ta sumamente contento y satisfecho. Pero mas ainda sumamente feliz cu nan a percura pa alarga nan bida.

Nota di redaccion:

E splicacion di e ministro ta keda insatisfactorio. Mientras cu for di su perspectiva el a haci bon pa busca caminda pa hinca cinco hende cu a bira ‘overtollig’ den su despacho, e bottom line ta cu tanto hende cu tabata traha den sector priva a perde nan pan, anto esey den tempo di crisis. Esaki ta loke no a bin dilanti den e discurso di e mandatario, cu aparentemente no ta mira mas leu cu su propio oficina y su ‘hendenan di confianza’. Ta esaki ta hustamente e problema general cu nos tin den nos gobernacion; esaki ta djis un ehemplo di e cosnan cu mester drecha.