Minister di Husticia, Andin Bikker a anuncia ayera durante un conferencia di prensa cu un par di luna pasa, nan a tene un simposio di un aña di existencia di e cas di siguridad Veiligheidshuis y el a bisa cu e simposio ey tabata dedica pa personanan cu trastorno.
Bikker a comenta cu den e simposio a presenta diferente sugerencia pa cambio di ley. Un di nan ta introduci e ‘Tratamento Obligatorio Ambulante’. Na Aruba ta existi un grupo di persona cu ora cu nan a comete un crimen, ora cu nan emiti un menasa of nan famia ta yama pa bisa cu e persona no ta bon di su cabes, e ora ey nan ta bin den beeld y na e momento si nan no tin un base strafrechtelijk, no por haci mucho cu nan.
Bikker a splica cu gobierno tin hopi contacto cu institutonan di Boneiro, un di nan ta Mental Health Caribbean cu ta concentra riba tratamento ambulante; esey kier men cu nan ta monitor persona den ambiente di hogar y e personanan aki no necesariamente mester ta cera den un instituto psikiatrico, pero igual tin control riba nan.
Tambe ta existi personanan cu no a comete ningun crimen y nan no a emiti algun menasa, pero e famia sa cu tin algun problema, mester di un monitor mas di cerca; como tambe personanan cu a bay den mundo di adiccion di droga. E personanan aki, a base di ‘Voorwaardelijke machtiging’ cu ta e ‘Tratamento Obligatorio Ambulante’, por pone nan bou di monitor di un psikiatra of psicologo pa por sigui mas di cerca, cu condicionnan por ehempel, tur siman mester bin cerca e psikiatra pa wak nan estado.
Bikker a manifesta cu actualmente e ley no ta duna instrumento pa esaki y nan ta bay mira con por resolve esey. Tambe cu sugerencia di Mental Health Caribbean, cu tambe tabatin un speaker den e conferencia cu nan a organisa luna di mei pasa y ora eynan nan a haya cierto recomendacion riba e concepto di nan, cual ta trahando na Hulanda cu hopi exito y cu lo por trece un impacto hopi grandi y positivo pa e comunidad.
Comments are closed.