Minister Otmar Oduber a laga sa cu gobierno ta cumpliendo ‘al pie de la letra’ cu e contract cu a wordo firma cu e compania EcoGas. E declaracion aki ta bin net awor cu documentonan manera e convenio entre Serlimar y EcoGas; y tambe e calculacion haci riba e tipping fee pa un compania di accounting, a cuminsa sali publicamente den prensa relaciona cu e impasse entre gobierno y EcoGas.
E mandatario ta haya cu na momento cu un di e partinan envolvi den e contract ta sinti cu no a cumpli cu e contract, libremente bo por bay Corte. Den e caso specifico aki, e ta haya cu si gobierno no a cumpli cu e contract, EcoGas por a bay Corte pa busca nan derecho den Corte. Pero den e caso aki e no a scucha e compania a bay Corte pa algo cu gobierno no a cumpli cune.
E ta haya cu a pesar cu gobierno si ta cumpliendo cabalmente cu e contract, lamentablemente e compania EcoGas, no a cumpli cu loke tabata parti di e contract. E mandatario a bin cu potretnan pa ilustra cu cantidad di desperdicio cu supuestamente mester wordo hiba na Parkietenbos, caminda e compania mester a paga tipping fee, y nan no ta haciendo esaki. Mas bien nan a crea un dump patras di e mesun compania cu e mandatario no ta kere cu ta corecto cu esaki ta tumando luga.
“Ami si por mustra riba echonan cu nan no ta cumpliendo cune den contract,” el mandatario a declara na prensa dialuna ultimo. Mientras cu gobierno y den e caso aki Serlimar na su turno si ta cumpliendo debidamente cu loke nan a cumbini cu EcoGas den e convenio aki.
Igualmente encuanto e destaho publico cu a wordo amplia te dia 31 di juli awor pa e compania interesa den e proyecto di incinerator grandi, e mandatario a reitera cu gobierno no lo tin cu hinca un florin tampoco den dje.
El a aclaria cu te awe nan no a haya niun oferta cu ta bisa gobierno cuanto e tipping mester ta. Tampoco no ta asina cu gobierno a haya oferta di companianan interesa den e proyecto di incinerator cu ta bisa kico e prijs mester ta pa bende coriente na WEB of kico ta e prijs of tipping cu mester paga pa sushi.
E ta kere cu rond di e caso aki tin hopi desinformacion caminda ta wordo mescla e contribucion cu mester bin na Serlimar y tur loke ta tumando luga riba maneho di desperdicio di sushi. Te hasta a wordo papia di 300 miyon dollar pa bin cu e proyecto di insinerado, mientras cu te ainda gobierno no a haya niun oferta aden na Aruba.
Minister Oduber a indica cu esaki ta un proceso transparente caminda un comision -cu el a cualifica como un ekipo serio- integra pa profesionalnan di gobierno y di afo, sindicato, sector comercial ta forma parti di dje. Tambe PAHO y conseheronan internacional, kendenan a bisa cu esaki ta e caminda cu pais Aruba mester bay, segun e Minister encarga cu Infrastructura, Desaroyo Teritorial y Medio Ambiente.
