Victor Compres Rosario a ricibi su credencial como Consul Dominicano na Aruba

E comunidad Dominicano tin un Consul nobo pa representa nan na Aruba. Ta trata di Victor Compres Rosario, kende recientemente a ricibi su credencial diplomatico.

Compres Rosario tabatin añanan residencia na New York. Aunke e no ta un diplomatico di carera, e tin un amplio experiencia diplomatico. E tin 16 aña na servicio di Ministerio di Relacion Exterior di su pais.

Pa 14 aña, Compres Rosario a fungi como Vice-Consul di Republica Dominicana na New York, unda ta biba rond di mas cu 700 mil Dominicano. Nan ta un di e gruponan di migrante mas grandi estableci na New York. Prome cu Compres Rosario a wordo nombra como Consul Dominicano na Aruba, e tabata eherce su funcion consular na Haiti.

E diplomatico aki ta un persona amabel cu kier laga un bon gestion y eherce un bon funcion na bienestar di e comunidad Dominicano na Aruba. Specialmente su deseo ta pa e sede consular por ofrece y amplia un bon servicio di expedicion di documentonan cu ta uno basico y necesario pa tur Dominicano.

Nan ta evaluando e posibilidad pa organisa un mision di e Junta Central Electoral (JCE) di expedicion di cedula. Pero prome cu e JCE aki bin Aruba, nan lo kier traha riba un campaña di informacion, ya cu un mision di e caliber aki ta demanda un logistica grandi.

Tambe tin asuntonan cu, como Consul, Compres Rosario lo desea di atende cu e autoridadnan local relaciona cu e comunidad Dominicano na Aruba.

Consul Dominicano, Victor Compres Rosario, hunto cu su Vice-Consul, Bartolome Gamundi y Hefe di e Seccion Comercial di e Consulado Dominicano, Edward McCollum kier extende un invitacion na e comunidad Dominicano den general pa bishita nan sede consular y mantene nan documentonan vigente.

Cualkier documento ta demanda un proceso burocratico cu ta tarda varios dia; y ta importante pa nan por tin nan documento na ordo y solicita nan cu tempo pa cualkier eventualidad.

Durante un reunion cu representantenan Dominicano trahando den medionan di comunicacion social, specialmente radio, e diplomatico a introduci su mes pa asina fortalece e lasonan di colaboracion entre nan. Consul Compres Rosario a priminti cu lo sigui informa e comunidad Dominicano riba diferente desaroyo cu lo bin na caminda relaciona cu nan consulado na Aruba.