Home Editorial Segun noticia ta bay y bolbe

Segun noticia ta bay y bolbe

390

Den e pais aki, algo grave o fastioso ta sucede, Y Tur medio di prensa ta dedica atencion na e sucedido, riba tono agita, y ta exigi pa remedia e asunto inmediatamente. Autoridadnan responsabel, esun cu un tiki mas pura cu e otro, segun e nivel di arogancia presente, of no, den e caso mas faborabel, ya ta priminti accion y mehoracion. Despues, ta sigura cu ‘nan ta bezig’, y despues, silencio…

Te ora algo sucede atrobe y nos bin ripara cu e problema no a keda resolvi, y tur hende ta cuminsa sclama cu ta pakico nada a sucede, ta ken ta esnan responsabel, cu supuestamente a pega soño, pareu cu nos, o talvez hasta prome cu nos? Nos ta reconoce e situacion aki? Si, muy probablemente den e dianan aki mes, ora nos haya di tende cu pasobra coriente a bay, holo di diesel a bolbe den hospital… Esey ta implica cu tur e tempo ey nan a logra haci algo pa suprimi e problema, mantene esaki manehabel, pero no a logra yega na e causa mes, pa soluciona esaki definitivamente? Asina ta parce, pero nos no ta sigur. No ta nada, pasobra sin duda, nos ta bolbe haya un splicacion cu ta convence algun, den e miho caso hopi di nos, mientras cu posiblemente atrobe e problema ta keda benta unda cu e tabata, te proximo incidente.

Nos tur ta corda e asunto di e diesel cu lo a bay den Bubali Plas. Despues a bin algo manera un declaracion cu no tabata berdad, cu ta duda cu e tabata diesel di hospital, cu tabata trata di instalacion eroneo, cu, enfin, nos tur a pega soño atrobe. Pakico riba e isla un gran parti di nos, no tur, ta pensa cu si algo malo pasa, e miho manera pa resolve esey ta no pensa mes riba e cos ey. Y di berdad esey ta yuda? O ta simplemente nos ta sinta warda te cu algo sucede atrobe, pa nos rabia, sclama atrobe ‘ta ken a keda di haci kico, el a hacie of no’?

Tur loke nos a skirbi aki no ta pa colga esnan na hospital figurativamente na e palo mas halto, pero e ta un bon ehemplo si con nos mes ta fayando. Nos mes ta acepta solucion mita mita, medio medio, anto ora e barco pega atrobe nos ta e promenan pa sclama. Kico mester sucede anto, pasobra e ciudadano comun y coriente cu mester purba cumpli cu su debernan, cu tin famia pa cria, trabao pa cumpli, etc. no ta bay tin tempo pa vigila tur e cosnan aki. Den e mundo cu nos ta biba aden, ta pesey bo tin prensa. Medionan di comunicacion no tey pa ricibi e comunicadonan di prensa, copy & paste nan den corant o riba nan website, y cla na ta. Nan tey pa haci e preguntanan fastioso, y insisti cu nan kier un contesta. Nos sa cu esey ta mas facil bisa, cu cumpli. Bo ta traha por ehemplo pa un medio cu ta comprometi cu e gobierno di turno, y bo doño di trabao no kier tende nada di critica riba e gobierno cu cual e ta simpatisa. Kier men cu abo no ta bay haci nada mas… E otro ta traha pa un medio cu ta opone, o en todo caso no ta simpatisa cu e gobierno di turno. By the way, nos no ta referi aki specificamente na e gobierno actual, pero ta papia en general. E periodista supuestamente opositor ta keha cu e no ta haya ni un hende pa atende, te pa e haya contesta riba su pregunta. Ban bisa cu esey ta berdad, aunke tambe e por ta un pretexto, nada mas, pa no tuma accion. Anto esey ta motibo pa laga e asunto te eynan? Nos no ta kere, pasobra no contesta, tambe ta contesta…

Y ademas, tin un aspecto hopi importante den tur esaki, y esey ta cu nos tin e tendencia, manera ta parce tambe den loke nos a skirbi aki te awor, cu tur cos ta depende di e nivel politico den e pais aki, loke absolutamente no ta asina. Na diferente nivel nos tin hopi hende cu ta carga responsabilidad tambe y nan tambe ta responsabel pa nan trabao y como tal mester duna cuenta di esaki tambe. Y ta prensa mester atende nan tambe como tal. Ta surgi un problema, ta atende cu e persona directamente responsabel. Si e sistematicamente ta referi bo na e mandatario en cuestion, bo mester dun’e di comprende cu den otro asunto, ora e acudi nan prensa pa cualkier cos, ta necesario bisa e persona cu bo no mester su comentario, pasobra e mes na otro ocasion ta declara su mes incapaz pa bisa algo, pues si bo no ta di peso, hala for di caminda.

Asina talvez nos ta logra, cu mas agresividad, y cu atencion pa sigui duna atencion na cierto suceso, cu nos por evita cu ora sucede algo atrobe, nos no ta puntra, “ta con a para cu e asunto ey? Nos no a tende nada mas…?” Bo a busca pa sa anto, con a para?