Parlamento lo trata e cuenta anual di 2016 cu ya caba tin dos periodo parlamentario cu ta wanta pa wordo trata creando un stagnacion riba e otro cuentanan anual pendiente.

E ta un asunto cu lider di fraccion di MEP, Rocco Tjon ta sinti cu e colegio di supervision financiero (CAft) tambe ta bin riba dje, ya cu e cuenta anual 2016 no a wordo aproba ainda. “Esaki ta un punto di preocupacion pa nan,” el a bisa

El a declara cu e motibo pakico di e tardansa aki, e pregunta aki mester wordo dirigi na gobierno. E ta haya cu esencia di e situacion aki ta cu gabinete anterior no a contesta Contraloria General (ARA), unda nan a gasta placa di mas di e presupuesto 2016.

Ta asina cu na momento cu parlamento a trata e cuenta anual 2016, a trece dilanti cierto punto cu nan kier haya un contesta riba dje. Pero finalmente nan ta bay haya contesta riba e preguntanan cu a wordo haci riba e cuenta anual 2016.

Tjon a bisa cu a base di e contesta aki pueblo lo bay haya sa na kico gobierno anterior a uza 10.1 miyon florin di mas, sin cu nan tabatin apropiacion di parlamento pa haci esaki. Den e caso aki e ta haya cu parlamento cumpliendo cu su responsabilidad lo sa di substancia ki parti di e suma aki a wordo destina por ehempel riba overtime of cualkier crisis cu a surgi. Of si al contrario a wordo destina pa cosnan cu no tabata un prioridad.

Loke si nan a compronde di e reunion cu nan tabatin cu e diferente partner envolvi, cu scarsedad di personal tabata un motibo di e tardansa tambe, pasobra banda di e pregunta formula riba e cuenta anual di 2016, tin pendiente esunnan di 2017 y 2018 cu tambe ta den preparacion caba. Pues tin esfuerso cu a wordo haci tambe riba ley di presupuesto 2020 cu ta canando pa su tratamento den parlamento. Den dje nan tin e tarea grandi pa percura cu presupuesto 2020 tin un surplus di 25 miyon florin.

Ademas e mocion cu nan a yega di entrega cu ta responsabilisa gobierno pa bin parlamento cada seis luna pa duna cuenta riba desaroyo di presupuesto, a nifica hopi trabou y stress pa e grupo envolvi den e tipo di tarea aki.

LEAVE A REPLY

Please enter your comment!
Please enter your name here