Parlamentario Rocco Tjon (MEP) a elabora riba encuentro parlamentario pa intercambio di pensamento tocante integridad y bon gobernacion cu a tuma luga diamars ultimo.

E encuentro aki a tuma luga despues di e reunion, unda a wordo trata e concepto di ley riba screening cu no a logra e mayoria di voto pa keda aproba. Un ley cu parlamentario Tjon hunto cu su colega Edgar Vrolijk a traha riba dje, pero cu te ainda no a haya e sosten necesario, specialmente di un di e fraccionnan di coalicion di gobierno, esta RED. Cual ta e futuro di e ley di screening aki?

Parlamentario Tjon a declara na Bon Dia Aruba cu a pesar di e situacion aki, e ta un proceso serio cu nan lo kier logra cristalisa por completo y nan no lo ‘give up.’ Ya caba nan a manda un carta pa presidente di Parlamento, caminda nan ta pidi Raad van Advies conseho riba e amiendanan cu a wordo entrega y e nota di cambio; ya cu e ta bay cambia e ley.

Consehonan di RvA

Nan lo bay keda na espera di e conseho di e organo consultativo (RvA). Unabes cu e organo aki ta bin cu su conseho riba cual articulonan ta fortifica si of no e ley aki. E ta kere cu den e caso aki nan tin un instituto imparcial cu a bisa algo riba e amiendanan. “Esey den e caso aki nos lo sigui como fraccion di MEP,” el a bisa. Den su edicion di ayera e matutino aki a publica algun di e consehonan cu e organo consultativo a trece dilanti riba e ley aki.

 

Sr. Tjon a declara cu si e puntonan cu RvA nan ta haya cu ta beneficia mas e ley, nan lo incorpora nan den e cuerpo di e ley, y e otronan nan lo bay contra di esey. E ta kere cu na final di dia pueblo sa con cada parlamentario ta posesiona su mes den e tema aki. Seguramente y teniendo na cuenta parlamentario Tjon su declaracion, un punto cu nan lo tene cuenta cun’e, y cu RvA a trece dilanti den nan conseho, tin di haci cu e uso of posesion di substancia prohibi como un motibo pa no bira minister, y cu no ta mucho bon defini den e ley di screening di candidato di Minister y Minister Plenipotenciario.

Ya caba como partido nan a asumi un posicion, el a bisa. Nan lider di partido y prome minister, Evelyn Wever-Croes a compromete su mes cu lo aplica e contenido di e ley. Kiermen cada persona cu den futuro kier traha hunto den gobernacion cu partido MEP, e lider di e partido cu lo ta e formado tambe y Minister President, e lo aplica e contenido di e ley aki, independiente si e ley lo wordo aproba of no.

Tratado

Bon Dia Aruba a trece dilanti cerca e parlamentario en cuestion cu pais Ariba a yega di ratifica e Tratado di Nacionnan Uni contra Corupcion, caminda e ley di screening ta uno esencial. Esaki hunto cu e ley di financiamento politico y di Defensor di Pueblo (Ombudsman) cu si nan a keda aproba. E hecho cu e ley di sreening ainda no a haya su aprobacion, e no ta un violacion fragante contra e tratado aki. Segun parlamentario Tjon, un di e meta di gabinete Wever-Croes ta cu nan ta bay cumpli cu e tratado.

Pero pa bay trata cun’e tin diferente aspecto cu mester tene cuenta cun’e tambe. Un di nan ta e ley di screening cu nan mester tene reglamenta. Aworaki loke tin ta un landsbesluit cu ta un tipo di decreto pero no cu e mesun herarkia di un ley. P’esey nan lo kier hancr’e den un landsverordening pa bira mas pisa.

E ta haya cu un aspecto cu nos mester tene cuenta cu e ley di screening ta cu e ta uno sumamente importante pa pais Aruba. P’esey e ta haya lamentabel cu e ley no pasa, pasobra e ley aki ta bay duna un base huridico na full e proceso di screening. “Asina bo ta bay percura pa fortifica bon gobernacion.” el a declara.

Tambe como pais nan lo busca e forma pa cumpli cu tratado internacional. P’esey el a retira cu pa loke ta e ley di screening, nan lo sigui traha riba dje. “Si den e siguiente votamento atrobe e bira 10-10, e ora si e ley ta wordo considera cu e no a wordo aproba, nos ta entrega mesora un concepto di nobo. Lag’e bay Raad van Advies atrobe y den seis siman nos tin un conseho pa nos bolbe bay trat’e,” finalmente el a bisa.

 

Esey ta loke prome minister a trece padilanti, y parlamentario Tjon ta kere cu e mensahe aki mester resona. Segun Sr. Tjon, nan no ta trata e tema integridad solamente ora cu ta cumbini nan politicamente, sino cu e ta un proceso serio cu nan mester logra cristalisa.

Ministerio fiho

Sr. Tjon ta haya cu e pasonan cu gabinete Wever-Croes a tuma den cuadro di integridad ta sumamente importante. Encuanto e tema di nepotismo, caminda ministernan di gabinete actual a busca hendenan liga na nan propio circulo familiar of di amigonan pa traha den nan misterio, cual ta wordo tipifica como ‘friends and family,’ parlamentario Tjon a contesta na Bon Dia Aruba.

Esaki ta un punto cu el a trece padilanti durante e encuentro parlamentario aki, y e ta haya cu ta importante pa compronde cu pais Aruba su constelacion di ministerionan ta diferente cu Hulanda y Corsou. El a splica cu nos no tin ministerio fiho. Cada bes cu un gabinete ta asumi su responsabilidad, e constelacion di e ministerionan ta cambia.

Personalmente parlamentario Tjon no ta haya bon cu den cada gabinete ta bin cambio den nan ministerionan. “Mi ta kere cu nos mester yega na dado momento na un situacion caminda bo por papia di ministerionan fiho,” el a declara.

Pues no obstante ken ta goberna of bin na mando, semper bo tin por ehempel un ministerio di Husticia, Siguridad y Integracion. Esaki ta brinda e posibilidad di asigna funcionarionan fiho tambe cu no ta cambia, cada bes cu un gabinete cambia. El a agrega no ta sosode mas, manera ta wordo bisa na Hulandes: “benoemd voor de duur van het kabinet.” E ta kere cu esaki ta un paso hopi significante cu nan por papia di funcionarionan fiho cu mester tin un descripcion di funcion y criterionan fiho, etc…

Segun parlamentario Tjon, e gabinete aki pa prome bes a percura pa Departamento di Recurso Humano (DRH) traha un organigram pa cada ministerio, caminda tur funcionnan ta prescribi.

E ta haya esaki importante, ya cu prome cu bo por nombra un persona den e funcion den e ministerio, e persona mester cumpli cu e rekisito cu cada funcion ta exigi di dje. Un ehempel cu el a trece dilanti ta cu ‘bo no por tin un consehero huridico cu no a studia ley.’

Igualmente el a laga sa cu den e maneho actual, e hendenan nombra den cada ministerio, nan salario tambe ta mara na e funcion a base di e maneho gubernamental pa loke ta personal. Otro punto cu e ta kere cu lo yuda fortifica practica di bon gobernacion ta cu a bin cu un limite, caminda cada minister mag di tin maximo 25 persona pa traha cun’e, incluso e minister mes. E ta haya cu e ta forma pa bringa e fenomeno di ‘friends and family.’