For di decada di añanan 70, sindicato FTA ta bin firmando contracto colectivo (CAO) pa e trahadonan di Holiday Inn hotel, y diahuebs nan a firma otro CAO di 3 aña cu e compania hotelero aki.

Presidente di FTA, Hubert Dirksz a bisa cu practica for di comienso di e presencia di Holiday Inn na Aruba, nan ta bin firmando periodicamente CAOnan. El a cualifica e CAO aki como un bon CAO, locual como sindicato, ta trece un satisfaccion y ta un muestra di stabilidad di e hotel aki.

E sindicalista ta haya cu e trahadonan no solamente mester ta contento cu e beneficionan, pero tambe pa loke ta e infrastructura di e area di trabou.

Reduccion ora di trabou.
Nan ta un di e hotelnan cu FTA a logra reduccion di ora di trabou pa nan miembronan, cu ta mas cu 200 trahado, cu ta un porcentahe halto. E hecho cu e trahadonan normalmente mester traha 48 ora y nan por logra bah’e pa 40, nan por haya 52 dia mas na cas. E ta un beneficio cu ta bon pa union familiar y pa aumenta productividad.

Tampoco bo salario no ta bay atras y basicamente e trahadonan ta hayando un aumento, ya cu e trahado ta na cas cobrando mesun cos. Pero tambe tin un punto cu e sindicato ta consciente cu mester atende conhuntamente, cu ta absentismo laboral of AO. E ta haya cu e discusion aki mester bin dilanti, ya cu cierto momento tin resistencia di reduci orario di trabou di 48 pa 40 ora, ya cu esaki ta nifica cu mester pone mas hende na servicio. Sinembargo e sindicalista a bisa cu esaki no ta e idea su tras. Pues si nan por bin cu cambio, mas bien riba nan forma di traha pa medio di miho maneho, ekipo y bon supervision.

Beneficionan CAO nobo.
E hecho cu nan a firma otro CAO -segun Dirksz- ta nifica cu e trahadonan ta bay dilanti. Un punto importante ta keda esun di aumento general, cu ta esun cu ta tuma mas tempo den tur negociacion di CAO. Nan a haya un aumento di 9.25% reparti den 3 aña. Pa esunnan cu tin mas cu 20 aña di servicio lo ricibi un aumento adicional riba nan salario.

E trahadonan a conoce un adelanto entre varios articulo of beneficionan importante den e CAO aki. Un di nan ta e cobertura di proteccion di salud pafo di AZV. Tin biaha pa motibo di salario of pa motibo di dos aña di incapacidad debi na e mesun malesa, Holiday Inn ta cumpli cu e ley di paga e 6 siman shen porciento, y despues di e periodo aki e compania ta duna e trahado 3 siman extra. Tambe tin un articulo ora cu e trahado ta den un situacion di malesa dificil, caminda tin posibilidad pa no sali perhudica.

Otro punto tin di haci cu e test di alcohol y droga. Aunke e ta un aspecto delicado, nan a bin cu e decision cu no solamente ta test e trahadonan, pero tambe gerencia. “Nos ta kere cu e ta un bon decision di e compania pa kita tur duda y mustra cu akinan no tin preferencia”, segun presidente di FTA.

E biaha aki, e sindicato a haci enfasis riba kico ta bay haci pa e trahadonan di mas aña di servicio y edad. Ta asina cu a percura pa bin cu mas incentivo pa e trahadonan por logra un bon acuerdo pa retiro. E ta un forma pa e trahadonan cu ta sinti cu ta cla pa bay por haci un bon uzo di e facilidad aki, no solamente pa duna espacio, sino pa nan por disfruta di un bon pension.

Housekeeping.
Tin biaha, den un CAO, tin departamentonan cu ta bay mas dilanti cu otro. E biaha aki nan a tene extra consideracion cu e trahadonan di departamento di Housekeeping, kendenan ta realisando un trabou hopi pisa.

Dirksz ta considera e departamento aki uno hopi importante di nos sector turistico. Den e CAO aki e trahadonan di Housekeeping di Holiday Inn lo bay haya mas placa pa e trabou extra aki. E ta un bonus adicional, cu por ehempel e trahado cu tin 20 aña of mas di servicio, lo haya 20 dia di salario; y entrante otro aña ta haya 21 dia.

E firma di e CAO aki no a bay sin lucha, y Dirksz ta haya cu hopi biaha e lucha no ta entre e partidonan, sino e union cu nan mester mantene. Sinembargo e ta reconoce cu ta resulta dificil pa satisface tur hende. El a duna reconocimento na e bon boluntad di e delegadonan, kendenan a hunga un rol hopi importante durante e negociacion di e CAO.

“Den un CAO, sin un bon aporte di e delegadonan ta dificil pa nos logra”, el a bisa. Tambe e sindicato a reconoce e boluntad y comprension di gerencia di Holiday Inn pa tene cuenta kico e trahadonan tabata desea y asina nan a yega na e CAO aki.

LEAVE A REPLY

Please enter your comment!
Please enter your name here