Nort Korea a bisa ayera cu a tene un ‘test hopi importante’ na su sitio di lansamento di raket di rango largo, cual segun reportenan a reconstrui despues di desmantela esaki parcialmente na cuminsamento di negociacion di desnuclearisacion cu Merca aña pasa.
E anuncio ta yega entre prospectonan scur pa resumi e negociacion, cu e Nort menasando di ‘busca un manera nobo’ si no logra haya concesionnan mayor di Merca pa fin di aña. Nort Korea a bisa cu si lo reanuda su test nuclear y misil di rango largo ta depende riba Merca.
E test diasabra na Sohae Satellite Launching Ground tabatin ‘un efecto importante riba cambia e posicion strategico di (Nort Korea) unabes mas den futuro cercano’, segun un vocero no specifica di e Academia di Ciencia di Defensa Nacional a bisa den un declaracion, publica pa e Korean Central News Agency.
Nort Korea no a bisa kico a inclui den e test. Kim Dong-yub, analista na Seoul Institute of Far Eastern Studies, a bisa cu Nort Korea probablemente a test pa prome biaha un motor di combustibel solido pa un misil balistico intercontinental. Uzo di combustibel solido ta aumenta mobilidad di un arma y ta reduci e tempo di preparacion pa lansamento. E raketnan di rango largo cu Nort Korea a uza sea den lansamento di ICBM of satelite den añanan recien tur a uza combustibel likido.
CNN a reporta diabierna cu un imagen di satelite nobo a indica cu Nort Korea lo por ta preparando pa reanuda test di motor uza pa lansamento di satelite y misilnan balistico intercontinental na e sitio.
Presidente Donald Trump a reacciona bisando cu Nort Korea ‘mester desnuclearisa’. “Kim Jong Un ta demasiado sabi y tin demasiado pa perde, tur cos en berdad, si e comporta di un forma hostil”, Trump a tweet ayera. “Nort Korea, bou liderasgo di Kim Jong Un, tin potencial economico tremendo, pero mester desnuclearisa manera a priminti.”
