Segun prome minister: ‘Mester convence Citgo cu General License 7a ta skirbi pa Aruba’

ORANJESTAD – Prome minister, Evelyn Wever-Croes a informa riba e situacion di e frontera cu Venezuela, y tambe tocante e General License 7a.

El a laga sa cu e ceramento di frontera cu Venezuela ta den un situacion di status quo. Kier men, no a conoce cambio y e ta sigui cera pa un periodo indetermina di parti di e regimen Maduro. Igualmente, e no tin duda cu e General License 7a cu ta flexibilisa e sancion di gobierno Mericano riba e compania Citgo ta beneficia Citgo Aruba tambe, pa sigui cu e fase 2 di rehabilitacion di e refineria na San Nicolas. Esaki a pesar cu sindicato IOWUA a laga sa -a base di diferente fuente cu nan a consulta- cu General License 7a no ta aplicabel pa nos, y cu e sancion ta keda pa nos.

Citgo y General License
Prome mandatario a indica cu aworaki e problema ta sinta den Citgo mes. E ta kere cu importante den henter asunto aki ta, pa nan por convence Citgo cu e General License 7a ta skirbi pa Aruba. “Y si nan no ta cumpli cune, tin mas sancion ta bini riba nan p’esey,” el a bisa. Contestando pregunta di Bon Dia Aruba, e prome mandatario no sa specificamente e problema cu Citgo mes tin cu e General License 7a.

Sinembargo, e por a imagina cu nan tin problema pa lanta e sancion y e placa mester wordo maneha pa otro hende. Mientras por ta nan tin otro intencion cu e placa. Den e mesun sancion ta stipula cu esaki no mag di yega na cuentanan cu tin di haber cu PDVSA y cu regimen Maduro.

Igualmente, premier Wever-Croes ta kere cu tin un parti practico. Ya caba Citgo a laga bay cantidad di trahado y a paga nan un pakete di retiro, manera nos ley laboral ta stipula. Ayera tardi tabata programa otro conference call pa logra mas informacion rond di e situacion aki. Loke gobierno kier ta pa lanta e sancion y e placa por drenta pa asina tuma e trahadonan bek.

Reaccion
E ta haya lamentabel e tipo di declaracion haci pa IOWUA. Segun e mandatario, e tipo di declaracion aki ta mustra cu e sindicato ta mas para banda di Citgo mes, y menos di e trahadonan, ya cu e sindicato ta ripiti loke Citgo y otronan ta bisa.

Segun e prome mandatario, e ta diferencia di Citgo y nan sa esey tambe. “For di dia cu nos a cera e deal cu Citgo, nos tabata sa cu nos tin un partner cu no ta totalmente confiabel,” el a expresa. Esaki debi na e situacion cu tin na Venezuela y PDVSA. E ta haya cu esaki a keda demostra constantemente den full e trayectorio aki.

E ta kere cu sindicato IOWUA, cu ta representa e trahadonan, por laga analisa e General License 7a of laga un hende analisa pa nan tambe. E ta haya cu IOWUA por ta parti di e discusion cu tin aworaki, hasta cu OFAC (Office of Foreign Assets Control), cu ta habri pa delibera riba e asunto aki. E ta kere cu OFAC mes -cu ta afilia na Department Of The Treasury- ta dispuesto pa laga y splica tur hende cu e General License 7a ta dirigi riba refineria di Aruba. “Pa nan weita cu e ta skirbi pa refineria di Aruba,” el a bisa.

E prome mandatario ta reitera cu esaki ta e general license cu nan a haya a base di nan peticion, basa bou informacion di Citgo mes. E nota cu gobierno mes a manda pa OFAC ta basa riba informacion cu Citgo mes a duna nan, asina e mandatario a bisa. Esta con nan structura ta hinca den otro, y con mester haci pa e placa por yega. A base di esey, OFAC por a duna un aliento temporal riba e sancion. Esaki –segun e prome mandatario- ta un discusion huridico cu ta den man di abogadonan.

Sindicato IOWUA a yega di expresa su preocupacion pasobra ainda e cortamento di personal den e refineria ta continua. E prome mandatario a laga sa su preocupacion tambe riba e mesun tereno aki. Premier Wever-Croes ta haya cu e situacion di e refineria ta uno dificil keto bay. E ta haya lamentabel cu e licencia general 7a a sali despues cu e gran mayoria di e trahadonan a wordo retira. Aworaki, nan ta percura di tene e personal necesario pa por mantene e siguridad di e refineria. E no ta haya importante pa drenta den un discusion ken ta gaña. E ta considera mas importante pa e General License 7a por wordo ehecuta pa e trahadonan por bin bek na nan trabou.

 

 

You May Also Like

5P3A9403.JPG

Truck carga cu santo a bolter na rotonde Pos chikito

Dialuna mainta na e rotonde di Pos Chikito a sucede un accidente entre un ...

Despedida emocional di polis Tino Ruiz

Polis, famia y otronan a tuma despedida ayera di polis Tino Ruiz (32) cu ...

Hoofdkantoor.JPG

Construccion di edificio nobo di Duana

– Edificio bieu di Duana ta na benta pa asina inicia proyecto pa un ...

ATA: Menos volumen pero no tin caida pisa di turismo

Director di Oficina di Turismo Aruba (ATA), Ronella Tjin-Asjoe-Croes a declara na Bon Dia ...

29Aug, JO, Amienda3.jpg

Amienda Codigo Civil: Ministernan lo ta cla pa fiha un posicion ?

Awe mainta parlamento mester a sigui cu e siguiente ronda di e reunion publico ...

‘Kico sociedad tin como expectativa di hende homber?’

Terapista di pareha na DAS Enid de Kort: “Bo mester ta macho, bo mester ...