License 7-a ta pa Citgo… Y ArubaPero no hay plata…

Cu interes nos ta sigui e discusion entre nos prome ministro y e lider sindical cu ta representa e (ex)empleadonan di e refineria. Esun ta bisa cu e famoso License 7-A ta skirbi netamente pa Aruba, mientras e otro ta bisa cu e licencia no ta aplicable pa Aruba. Kico pa haci den e disputa aki? Nan tur dos no por tin rason… Laga nos purba trece algo di claridad den e asunto aki, y de paso ilustra un poco e situacion actual entorno e refineria.

Na prome lugar esaki ta obliga nos di tira un vistazo atrobe riba e license aki, cu a sali den Bon Dia Aruba di dia 19 di maart recien pasa, pa tur hende por a tuma nota di e contenido. Den e editorial di mesun fecha nos a dedica algun atencion na e topico, aunke no den un articulo exclusivamente pa esaki.

E prome conclusion tabata cu e licencia ta encera, segun nos evaluacion, e posibilidad pa transferi fondo, material, servicio o tecnologia dentro di e consorcio forma pa: PDV Holding Inc. y Citgo Holding Inc. y e subsidiarionan di ambos. Kico ta e caso? PDV Holding ta e compania Mericano mas halto den e herarkia interno, cu ta e subsidiario directo di Pdvsa, e ultimo aki estableci na Venezuela. Citgo Holding Inc. riba su turno ta un subsidiario directo di PDV Holding. Sin embargo, Citgo Aruba Holding LLC tambe ta un subsidiario directo di PDV Holding, y na su turno ta e empresa ‘madre’ di e NV-nan na Aruba cu ta comparti e nomber Citgo, entre nan Citgo Aruba Refining NV, e entidad cu ta directamente atendiendo e rehabilitacion di e refineria. En todo caso, nos interpretacion ta cu e subsidiarionan di PDV Holding por atende asunto di negoshi normal entre nan, tambe na Aruba, pero placa no por bay pa Pdvsa, pasobra Pdvsa ta keto bay den man di gobierno di Nicolas Maduro.

E siguiente pregunta ta si e License 7-A ta diseña y emiti specialmente pa Aruba. Nos no ta kere cu esey ta logico. Nos sa si cu prome ministro tabata na Merca unda el a papia, segun su relato, cu OFAC (Office for Foreign Assets Control) di Tesoreria di gobierno Mericano, y lo a expone nan e situacion cu e proyecto na Aruba ta aden. Nos no ta duda di esey, pero emiti un licencia specialmente pa Aruba y no pa atende e asunto hopi mas urgente di e otro partinan di e consorcio na Merca mes, cu a topa cu un problema, ora cu e companianan na Merca a haya otro doño, o mejor dicho, a haya otro representante, gobierno di Guaido, di e propietario, cu ta estado Venezolano, no ta make sense.

A bin un kiebra cu e empresa ‘madre’ na Venezuela, Pdvsa, cu ta sigui den man di gobierno Chavista, y esey a haci cu e situacion na Merca a cambia, unda operacion solido di e companianan na Merca a bira un prioridad pa gobierno di Guaido. Esey a haci necesario e peticion di e grupo, cu PDV Holding na cabes, na OFAC pa un excepcion riba e Prohibicion General di november 2018 pa nan por opera conhuntamente, garantisando cu placa no por pasa bay den man di Pdvsa. Esey ta e base, logico, di e License 7 y su sucesor, License 7-A, segun nos opinion.

Sin embargo, esaki no ta cambia tanto den e situacion di e refineria, pasobra e problema no ta pa e consorcio di Citgo haci algo na Aruba, sino cu e problema financiero ta impedi nan di tur manera pa haci algo, en todo caso na e momento aki. E problemanan financiero den e proyecto ta data di prome cu e ultimo sancionnan a bin na vigor y awor e panorama no a bira mas positivo tampoco. Ademas, den e comunicado di nos prome ministro mes ta relata cu e compania a paga un pakete di retiro na varios empleado. Awor bon, ki dia a tende cu un dunador di trabao ta laga hende bay cu un pakete, pa un par di luna tuma nan den servicio atrobe? Nos ta haya cu ambos banda den e discusion aki ta falta sinceridad cu e trahadornan envolvi. Manera nos prome ministro mes a bisa repetidamente, e ta un caso perdi pa 99% caba, pero ta luchando ainda cu e speransa cu e 1 ey por haya dos cero su tras… esey no ta bisa suficiente?

Nos ta comprende cu nos prome ministro mester mantene, pa motibonan huridico so caba, un cierto posicion unda ta duna Citgo beneficio di duda, te na e momento cu ta papia di incumplimento cu e contract y por clausura e capitulo aki. Esey ta un realidad hopi grandi cu gobierno no por ignora. Loke ta sucediendo cu e asunto di e License aki, ta ‘windowdressing’ te ora e show aki caba. Atrobe, pa motibonan tactico e premier no por bisa esaki, pero nos si por bisa, y cu e hechonan pa sustenta e opinion. Mientras tanto, pa e sindicato tambe ta mas facil pa bisa cu e premier no ta papia berdad, cu yuda e empleadonan retira acepta e realidad cu probablemente no lo tin proyecto mas.

 

You May Also Like

Gobierno nobo mester claridad encuanto refineria

Desde firmamento di un acuerdo na palacio Miraflores na juni 2016, cu tur bombas ...

editorial 2_15_1.jpg

Yobida fuerte y infrastructura inadecua

Tin les pa siña…   E awasero fuertisimo di algun dia pasa a pone ...

Porfin atencion pa contaminacion industrial na San Nicolas?

Nos ministro encarga cu salubridad publico a trece e problema di contaminacion industrial (refineria) ...

editorial 2_15_1_90.jpg

Dos luna y nada di Valero Reapertura no tin fecha?

E siman aki ta haci dos luna cu a conclui e acuerdo cu Citgo ...

Kico ta haci cu mucha stranhero ilegal?

Ministro presidente y ministro encarga cu migracion, a anuncia cu ta bin maneho nobo ...

Unda e ombudsman a keda?

Riba e tema ‘ombudsman’ tambe ta reina un silencio. Un poco straño si tur ...