Director di Refineria di Aruba (RdA), Alvin Koolman su carta di renuncia a tuma luga na momento cu varios situacion ta tumando luga pareu rond di e compania estatal aki.
Un di nan tin di haci cu e proceso di negociacion cu Citgo pa asina pais Aruba por tuma over e maneho di e refineria y busca otro compania interesa den su reapertura. Otro tin di haci cu e investigacion cu ta tumando luga relaciona cu e contracto controversial di parlamentario Richard Arends como director financiero di RdA, y di tur esnan envolvi den e asunto aki. Pero tambe e asunto di nombramento di famia yega na Prome Minister di Aruba den e directiva nobo di RdA.
Encuanto e ultimo punto, e prome mandatario, Evelyn Wever-Croes a laga sa cu el a wordo cuestiona cu e tin un primo cu ta traha den RdA. Sinembargo e no sa nada di e supuesto miembro di su famia su nombramento; y si e ta eynan trahando ta a base di su propio merito. Tampoco e no ta esun encarga cu e tarea di emplea personanan cu ta traha den e compania estatal aki.
E prome mandatario di Aruba su envolvimento tin di haber mas tanto ken ta of punta un director pa un compania estatal como representante di e mayor accionista cu ta gobierno. El a bisa cu el a wordo confronta cu e tipo di pregunta aki den parlamento for di un miembro di e fraccion di oposicion.
Oficina di abogado y RdA
Otro cuestionamento cu e ta bin hayando tin di haci cu e envolvimento di e prome mandatario su tata, Abogado Hendrick Croes, den RdA.
E mandatario a bisa cu su tata no ta emplea pa RdA, sino cu e ta emplea pa su propio oficina di abogado. El a aclaria cu e envolvimento di e oficina di abogado unda su tata ta traha ta RdA mes a tum’e, y e no tin niun sorto di envolvimento den dje.
Es mas, e mes a pidi nan pa no hacie, ya cu politicamente nan ta pone su persona den un situacion cu e mes como Prome Minister no kier ta, pero toch nan a dicidi di tuma e oficina di abogado di su tata pa bienestar y interes di e compania RdA.
Prome Minister a declara cu RdA a informa su persona cu nan ta traha cu dos of tres diferente oficina di abogado dependiendo di e asunto huridico cu nan tin cu atende. Den e caso particular aki, na prome instante el a pidi RdA pa no contrata e oficina di abogado unda su tata ta traha pa atende asuntonan laboral, disputa di contract, etc… Pero na ultimo RdA mes a tuma e decision -segun prome minister- di tuma e oficina di abogado unda su tata ta traha pasobra ‘nan tabatin mester di un abogado cu experiencia pa negosha e contract cu Citgo y sali for di e contract di Citgo.’
