Practicamente ora cu Prome Minister di Aruba, Evelyn Wever-Croes a bay firma e acuerdo cu Hulanda diabierna ultimo, nos rosea financiero cu tabatin a base di diferente maniobra, entre nan prestamonan haci na cierto interes no preferencial, a yega su final.

Esaki a exigi cu na final e mandatario mester biaha pa Hulanda pa asina termina di atende e asunto di e acuerdo aki cu Hulanda y asina e ta wordo trata den agenda di conseho di minister di Reino. Bon Dia Aruba a puntra e mandatario si a vale la pena warda tanto luna pa bin cu un proceso di negociacion pa finalmente ora cu e rosea financiero a caba bay pura Hulanda y firma e acuerdo aki.

E mandatario ta convenci cu si a bale la pena, ya cu na september e opcion cu tabata riba mesa no tabata un opcion viabel pa nos. “E tabata un opcion cu nos no tabata sobrevivi como pais.” Vooral si e placa di tres luga a extende pa cinco luna. Pues e tabata e mesun efecto cu si nos a bay di acuerdo y toch fia placa, el a bisa.

Tambe el a bisa cu loke tin aworaki den e acuerdo no tabatin na september. Es decir e cambionan den e leynan di Reino mes, caminda autonomia di nos pais ta salvaguardia. Tin areglo pa loke ta e prioridadnan den e landspakket entre Ministyer President y COHO. Prome cu esey e aspectonan ki tabata den e leynan di Reino.

El a reacciona bisando cu e proceso tabata uno transparente total, y no manera algun politico a insinua cu el a bay Hulanda manera “ladron di anochi bay firma.” Ta asina cu diaranson atardi cu practica gobierno ta cla cu e condicionnan di Hulanda, pero ainda tabata falta algun detaye, toch prome minister a dicidi di biaha. El a bisa cu a wordo saca for di contexto e declaracion di parlamentario Edgar Vrolijk, despues di e reunion di comision central, unda el a bisa cu no ta necesario pa bay Hulanda.

Premier Wever-Croes a laga sa cu e momento ey (dialuna) e mes tabata convenci cu no tabata necesario bay Hulanda. Diamars ainda e no tabata convenci di biaha pa Hulanda, pero diaranson mirando cu ya nos no ta “leu di otro,” pero via comunicacion moderno pa atende algun detayenan, el a dicidi di biaha. Segun e mandatario, el a informa Parlamento na e momento ey.

E biaha ey, el a yega di duna un declaracion na prensa prome cu el a aborda e avion rumbo pa Hulanda. “Ma duna un declaracion na prensa casi na pia di avion na aeropuerto pasobra den un rato cos mester wordo regla,” el a declara. Y diabierna 13 di november nan a tene un conferencia di prensa conhunto na Hulanda.

For di dos siman pasa caba e ta bin bisando cu nan ta luchando pa nos ta den agenda di conseho di ministro di Reino di 13 di november. Tambe dialuna siman pasa el a bin cu un elaboracion riba unda pais Aruba ta para den e negociacion cu Hulanda, caminda e tabata busca sosten di Parlamento e mesun atardi ey pa medio di un reunion di comision central.

Sinembargo el a yega di expresa caba cu gobierno ta cla pa acepta e condicionnan. Tambe diamars ultimo el a tene un biaha mas un cumbre cu tur stakeholder cu a wordo transmiti via TeleAruba pa henter comunidad por sigui esaki.

El a argumenta cu unabes cu gobierno a haya e pakete di condicion na juli y cuminsa papia di dje, nan a bay Parlamento varios biaha, y tambe organisa durante e cuater lunanan ultimo diferente cumbrenan cu sector comercial (priva), sindical; y tambe cu lidernan politico. Tambe cu hobennan profesional (young professionals) pa splica tur loke tin di haci cu e exigencianan di Hulanda y e manera con gobierno lo atende cune y tambe pa nan por scucha feedback.

El a bisa cu durante varios reunion cu nan a tene na Parlamento, gobierno por a comparti un update di tur loke tabata sosodiendo y cu nan a comparti ‘tur loke nos por” cu nos organo legislativo y informa nan debidamente.