(Independent) – Na 2020, un ciudad Mexicano a keda como lider di e clasificacion di e ciudadnan mas violento na mundo. Asina a informa e Conseho Ciudadano pa Siguridad Publico y Husticia Penal A.C. Di acuerdo un rapport, e municipio Celaya di Guanajuato a bira esun mas violento na henter planeta ora aña pasa a registra 109.38 homicidio pa cada 100.000 habitante.

Den un muestra chikito di e nivel di violencia cu e Mexicanonan ta biba desde haci algun añanan, Tijuana, Ciudad Juárez, Ciudad Obregón, Irapuato y Ensenada ta bin despues di Celaya, loke ta duna na Mexico e seis ciudadnan mas violento na mundo. Asina mes, Uruapan, Michoacán ta forma parti di e prome 10 luga ora a ocupa na e luga number 8.

Segun e rapport di Conseho Ciudadano pa Siguridad Publico y Husticia Penal A.C, esaki ta e di cuater aña continuo cu un ciudad Mexicano ta lider den e clasificacion aki. Ademas, ta di shete ocasion desde cu e lista aki ta publica y cu Mexico ta lider di dje.

Conseho Ciudadano pa Siguridad Publico y Husticia Penal A.C ta sigura cu violencia a bira pio durante e prome dos aña di gobierno di Andrés Manuel López Obrador, ken ta wordo cuestiona pa su politica pa combati delincuencia.

“Mexico tin dos aña como epicentro mundial di violencia homicida. No ta un casualidad. Na 2019 y 2020 a aplica e pio politica di ‘control’ di crimen, di parti di gobierno Andrés Manuel López Obrador: di un banda, ora no a actua contra gruponan criminal, e principal responsabel di violencia, mas cu bao e suposicion cu si e forsa di orden no ta molestia e criminalnan, nan lo comporta su mes bon; di otro banda, aplica programanan amplio di subsidio cu e speransa cu e delincuentenan, a cambio di esey, lo stop di comete actonan ilegal”.

LEAVE A REPLY

Please enter your comment!
Please enter your name here