Vicario di e Diocesis di Willemstad na Aruba, Andres Makowiec, a expresa gratitud na tur partner envolvi den e proyectonan di embeyecemento cu gobierno ta realisando den e area pafo di diferente misanan rond di Aruba.

Pastoor Andres a bisa cu e misa ta manera e center di cada un di e diferente districto y bario. Considerando cu mayoria di nos poblacion ta Cristian Catolico, misa ta un sitio sagrado, unda cada un di nos ta reuni pa haci oracion. P’esey ta importante pa embeyece e areanan rond di dje.

Igualmente nos por mira cu den cualkier pais di mundo nan ta trata di haci e misanan y rond di dje lo mas bunita, y no solamente den bista di pueblo, pero den bista di nos respet y amor pa Dios. “Esaki en general ta expresion di fe y gratitud di pueblo pa cu Dios,” el a bisa. E trabou di embeyece a tuma luga den diferente parokia na Playa, Dakota y Paradera. Tambe recientemente San Nicolas, unda tur creyente por sinti nan mes mas confortabel.

Encuanto si lo bin mas proyecto di renobacion y embeyecemento di misanan di parti di e diocesis di Willemstad, Vicario Andres Makowiec a bisa cu cada parokia ta lucha manera nan por, pasobra pa realisa e tipo di proyecto aki, nan ta depende basicamente di e generosidad di e parokianonan y di pueblo en general.

E instalacion di airco den diferente misa, e ta haya cu awendia no ta asunto di luho sino di necesidad. Actualmente tres parokia tin airco, entre nan Santa Cruz, Dakota y Playa; pero tambe e capia di Tanki Leendert. Te aworaki no tin otro cu misa cu ta realisando e proyecto di ponemento di airco. E airco ta yuda pa e parokianonan por sinti nan mes a gusto ora di haci oracion y tambe den participacion den e celebracion di eucaristia.

E ta haya cu den cuadro di Misa Santa Filomena su 70 aniversario, ta un bunita ocasion pa pastoor Toti Fuentebella y e parokianonan di Paradera, hunto cu gobierno, cuminsa cu un proyecto pa embeyece pafo di e misa. Pero tambe realisa nan proyecto di e cas parokial. E parokia di Savaneta ta bay cumpli 120 aña di existencia na 2020, Makowiec, kende ta pastoor na Savaneta a bisa cu nan ta biniendo cu un serie di proyectonan chikito. A pesar cu nan entrada ta limita, nan lo probecha pa haci algo den un fecha tan special asina.

 

 

LEAVE A REPLY

Please enter your comment!
Please enter your name here