Segun vocero di fraccion AVP, Melvin Tromp: Tin algo mas profundo relaciona cu parlamentario Rocco Tjon

Un biaha mas, ex parlamentario y actual vocero di fraccion y di partido AVP, Melvin Tromp a referi riba un posibel caso di abuso relaciona cu un menor di edad y un parlamentario. El a referi specificamente na e lider di fraccion di MEP, Sr. Rocco Tjon. Un caso cu e ta considera hopi serio y cu mester trece claridad riba dje.

Contestando pregunta di Bon Dia Aruba tocante e caso delicado aki, Tromp a bisa cu e ta consciente cu ta trata di un menor di edad y pa tal motibo e no ta menciona nomber, ya cu e ta respeta e menor su derecho. “Mi ta respeta e mucha aki total. Mi nunca a menciona nomber di niun hende, ni di mama, ni di yiu, pasobra nan no ta locual nos ta buscando,” el a bisa. Igualmente Tromp a bisa cu ‘hamas y nunca’ el a papia of tuma contacto cu e personanan envolvi den e caso aki.

Tampoco e kier hinca e asunto aki den un contexto politico. Pero considerando cu Tjon ta haci uso constante di e palabra integridad, lo ta bon pa e duna honor na e palabra aki. Ya cu e ta un promotor pa cuminsa cu un camara di integridad pa politiconan na Aruba. Pero Tromp ta haya cu si Sr. Tjon kier bay den e direccion ey, e mester tuma su propio conclusion. “Integridad ta conta e ora ey pa un y tur,” el a expresa.

Tromp a bisa cu for di dos aña pasa nan ta bin denunciando e caso aki. Te hasta tres procedura huridico a tuma luga, caminda den e dos prome, hues no a haya prueba pa dicta un veredicto contra e parlamentario. Sinembargo den e ultimo caso, caminda hues a bin cu un sentencia siman pasa cu ta distancia parlamentario Tjon for di su propio yiu, Tromp ta haya cu ‘tin algo cu e hues ey a mira’.

E no ta kere cu ta cuestion ‘si bo ta meti of bo tabata meti, of bo no tabata meti’. Pero na momento cu un sentencia di hues ta bisa cu pa e parti sano di henter e proceso cu nan ta mira cu e tata, den e caso aki Tjon, no por acerca su propio yiu pa un cierto periodo, e ta algo cu mester tene cuenta cune. Tromp a bisa cu e tin conocemento di un carta cu e propio yiu muhe a manda pa Gobernador di Aruba cu e peticion di kita e fam di su tata y keda cu e fam di su mama.

Vocero di AVP ta kere cu un peticion di e caliber aki ta nifica cu ‘tin algo mucho mas profundo di locual ta regarda e preocupacion cu bo ta meti como parti di e comunidad aki’.

Tromp a haci un apelacion na prensa pa acerca e parlamentario en cuestion pa confirma of no si loke el a trece dilanti durante un conferencia di prensa ayera ta berdad si of no.