ORANJESTAD – Yuri Bracho, kende ta organisa e marcha di diabierna awor contra abuso sexual di mucha, ta determina pa e accion aki no ta simplemente un marcha cu ta bay den olvido, sino cu mester trece cambionan necesario pa proteha nos muchanan contra pedofiel. Bracho a bisa cu e hendenan mes a pidi’e via Facebook pa organisa e manifestacion aki.

E lo ta cla pa sigui ya sea aki un luna of dos luna of mas, pero e lo sigui bek si. E no ta sinti como ciudadano di pais Aruba, cu loke e ta trece dilanti mañan no a wordo tuma na serio. Esaki mirando cu recientemente, otro fundacion cu ta bin luchando pa añanan riba e mesun causa a entrega un biaha mas un manifiesto, y te ainda nan no a logra nada concreto. E biaha aki no ta djis entrega un manifiesto y bay.

E ta haya cu e momento ta awo, y no mester warda mas cu e tipo di abuso aki lo sigui scala. “No mester warda cu algo asina pasa cu un yiu di un politico of un hende den Bestuurskantoor. E mester sosode awor!” El a trece e cifra alarmante di dos pa tres caso pa dia di abuso di mucha, y e cifra por ta mas.

Igualmente, el a aclaria cu e manifestacion aki, cu lo reuni pa 4’or na Linear park (dilanti di Notario Yarzagaray), no tin nada di haber cu politica y tampoco e tin un color politico. E ta bin hayando hopi reaccion di pueblo y e tin fe cu nan ta bay logra. Bracho kier distancia e manifestacion aki for di cualkier contexto politico. Den pasado, tambe tabatin e tipo di manifestacion aki, unda esunnan cu a yega di organisa a sali pa color politico, pero te ainda e cambio no a bin.

E biaha aki nan manifestacion no ta tras di propaganda. Locual nan kier ta pa e mayornan, y si ta posibel e muchanan y tur hende, bin uni hunto pa e manifestacion pacifico aki. Esun cu kier bini na preto of na blanco of na cualkier otro color, nan por bini libremente. E ta haya importante pa e mayornan bin cu e muchanan, ohala cu nan cosnan di hunga, pasobra e mucha mester sa mas y bira mas consciente. Den e manifestacion lo tey William Grizales di Willy Pan, cu lo tin popcorn y cos dushi pa e muchanan.

 

E ta algo -segun Bracho- cu ta pa nos muchanan. “E no ta pa mi yiunan so, sino pa bo yiu y pa tur nos yiunan’. Tambe el a gradici cu otro instancia cu ta hiba e mesun lucha aki por join cu nan. E no a acerca e instancianan of fundacionnan aki, pero e ta invita publicamente pa nan uni den e marcha aki. “Tur ta bonbini.” Bracho a gradici e sosten cu sindicato FTA a yega di expresa pa cu e manifestacion aki.