Ayera mainta durante un conferencia di prensa di Gobierno di Aruba, Minister di Enseñansa y Deporte, Endy Croes y Minister di Labor, Energia y Integracion, Glenbert Croes, hunto cu directora di Colegio EPI, Ankie Danker, stage coordinator di Colegio EPI, Eddelyne Dijkhoff y PR di IberoStar, Ghislaine de Windt, a presenta e iniciativa di stage pa nuebe studiante di EPI cu IberoStar na Mexico.

“Pa nos awe mainta ta un momento hopi special ya cu nos a bin ta trahando riba e proyecto aki for di varios luna,” Minister Endy Croes a expresa. El a splica cu den 2022 gobierno a ricibi bishita di staff y gerencia di IberoStar, unda cu semper a puntra con ta e manera pa un cadena di hotel grandi cu ta inverti na Aruba pa e propio alumnonan di Aruba, esnan cu ta bay drenta e mercado laboral, por traha di cerca y asina haya un oportunidad pa por wordo educa na cierto manera cu nan por bira un empleado di IberoStar den futuro.

El a sigui splica cu IberoStar a acerca Colegio EPI y a scoge un total di nuebe alumno pa bay e facilidadnan di IberoStar na Mexico y pa ricibi training tanto den e sector hotel y turismo como tambe den e sector di ciencia y tecnologia.

“Nos ta hopi contento cu un cadena asina grandi, un cadena cu ta representa mas di 100 hotel rond mundo den 16 pais y ta traha hopi di cerca cu gobierno y comunidad di Aruba y di e manera aki ta ofrece nan nos propio studiantenan, brasa nan y hiba nan pa alrededor di ocho siman pa nan por sigui e stage y preparacion pa por cumpli cu e standardnan di IberoStar y cu e garantia cu ora nan bin back nan lo por tin un trabao tambe pa traha den un of otro hotel di e cadena di IberoStar,” e minister a enfatisa.

Directora di Colegio EPI, Ankie Danker, a ratifica e importancia di e iniciativa aki pa e scol. El a remarca cu den otro momentonan nan a subraya cu pa EPI su existencia ta importante pa comercio sostene e scol y pa tin cooperacion ariba diferente proyectonan.

“Tambe pa e studiantenan por haya un experiencia cu ta unico pasobra esaki ta un oportunidad unico cu nan ta haya. Mi kier gradici gobierno y IberoStar pa un iniciativa asina bunita,” el a remarca.

El a splica cu nan ta den proceso di e internacionalisacion di stage y nan ta encurasha nan studiantenan pa bay afo pa asina nan haya experiencia pa ora nan bin back Aruba nan bin ekipa pa sigui traha pa Aruba. “Pa nos esaki ta algo hopi importante y hopi bunita,” el a resalta.

Danker a recorda comercio cu Colegio EPI ta importante pa tin proyectonan asina pa e studiantenan por haya un experiencia unico cu ta duna nan carera na EPI un balor agrega.

“Pa nos e ta importante cu nan por experiencia esaki. Comercio si boso tin proyecto bunita cu nos por yuda, cu boso lo kier envolve nos studiantenan, laga nos sa nos ta habri pa esaki pa nos por sigui coopera. E scol tin planes hopi bunita, tin hopi proyectonan ta bayendo y nos kier sigui den e direccion aki di innovacion,” el a enfatisa.

Eddelyne Dijkhoff, stage coordinator di Colegio EPI, a indica cu e scol a manda ayera seis alumno di e sector technico pa haci nan stage y fin di luna tres studiante di sector hospitalidad y turismo tambe lo sali rumbo pa Mexico pa realisa nan stage hunto cu IberoStar.

El a splica cu e intencion ta cu e studiantenan ta pasa ocho siman den e sector tecnico na e hotel Riviera Maya, pero despues nan stage no a caba pasobra aki na Aruba mes IberoStar ta trahando riba un otro hotel y e intencion ta pa e studiantenan haci e resto di nan stage na Aruba mes.

“E bunita ta cu nan ta bay tuma e conocemento na Mexico, cual ta un oportunidad hopi bunita y super. E conocemento cu e studiantenan aki lo ricibi y trece back pa nos dushi isla Aruba lo ta uno super grandi y pa EPI tambe. E intencion ta pa ora nan bin back Aruba nan sigui cu e pasantia na IberoStar na Aruba mes,” el a resalta.

Dijkhoff a subraya cu stage ta super importante pa un beroepsopleiding. El a remarca cu Aruba ta un isla chikito y mester enfoca ariba stagenan nacional y internacional y cu ayudo di companianan manera IberoStar y Gobierno di Aruba, por yega pa haci MBO na Aruba algo hopi bunita y grandi. “Enseñansa ta importante, sin enseñansa un pais no ta bay dilanti,” el a resalta.

Ghislaine de Windt, PR di IberoStar, tabata encarga den nomber di IberoStar, pa anuncia e prome sponsorship di e prome grupo di studiantenan cu lo realisa nan stage na IberoStar Playa Paraiso na Riviera Maya, Mexico.

“Como parti di nos compromiso pa fomenta talento hoben di Aruba, nos a brinda generosamente alohamento completo y sosten pa e studiantenan durante nan periodo di stage,” el a resalta.

El a sigui splica cu e studiantenan selecta lo embarca ariba un biahe inolvidable pa Mexico pa obtene un experiencia valioso y practico den sector di servicio technico y mantencion di hotelnan, product design den industria hotelero, construction engeneering den hotel design y construccion.

Por ultimo el a enfatisa cu e iniciativa aki ta un testamento di IberoStar Aruba su dedicacion pa duna back na comunidad di Aruba y inverti den e futuro lidernan di Aruba. “Nos no por a haci esaki sin e scol EPI y nos ministernan,” el a finalisa.