44 aña pasa, seis profesionalnan den diferente ramo di medicina a bini hunto anto dicidi pa ofrece seminario pa comparti informacion di nan profesion cu esunnan interesa. Expertonan den entre otro cirugia, cuido dental como tambe psicologia y mas lo ta presente otro siman pa un seminario di tres dia.

 

Un di e coordinadornan principal como tambe medico cu un historia di 60 aña, dr. Robert J. Isaacson ta bisa Bon Dia Aruba: “Patronisa pa e County Dental Society di Detroit,  dr. Marshall Herschon tabata un di esunnan cu a tuma e iniciativa pa start cu e seminarionan aki. Despues di varios aña, a dicidi pa cuminsa haci seminarionan den otro areanan, pues Dr. Herschon a pidi mi pa mi continua cu esaki. Awo nos ta na Aruba pa un otro seminario pa informa riba entre otro diagnosticacion, tratamento , resultadonan y consecuencianan di cuido dental, como tambe expertonan cu ta bay dialoga riba formacion di piedra di riñon.”


Esaki ta un ‘non-profit program’ caminda cu e fondonan ta wordo entrega na e Dental Society na Monmouth-Ocean County. “Nos ta haci donacionnan na e Aruba Dental Society como tambe un diferente fundacion na Aruba tur aña.” Cu apoyo di un dokter local, esta dr. Rick Samuels kende a coordina e programa cu e team di dr. Isaacson, a continua cu e programa aki na Aruba compartiendo informacion medico hopi valioso. E topiconan di e seminario ta mas basa den e ramo dental y otro disciplinanan similar. Dr. Isaacson ta bisa cu e participantenan ta participa boluntariamente, den un ambiente relaha unda ta dialoga y comparti informacion cu otro.

 

Programa

E seminario ta di tres dia cuminsando 26 di december pa 9’or di mainta na Playa Linda cual ta gratis pa localnan cu ta interesa. Si bo ta interesa, bo mester bay registra dialuna mainta na e hotel mes. Riba e prome dia aki ta bay tin un presentacion di entre otro dr. Fabio Moreta, un Arubiano cu ta practica Urologia, cual ta cirugia cu ta concentra riba enfermedadnan di e sistema orinario di hende homber y muhe. Riba 27 di december, dra. Anat Kuperman lo duna un presentacion riba varios topico. Sra. Kuperman ta un clinico cu a cuminsa su training na Pricewaterhouse Coopers.
Dr. Brad Levine, un psycologo di Emory College na Atlanta tambe lo ta dunando un presentacion riba e dia aki elaborando riba su profesion. Dr. Levine ta specialisa den e mantenemento di e parti paden di bo djentenan cual ta un studio cu yama “Endontology”. E siguiente dia, 28 di december, Dr. Robert J. Isaacson lo duna su presentacion anto elabora riba varios tema relaciona cu cuido dental.