(AP) — Un hues na Los Angeles ayera a sentencia e homber condena di tira mata Nipsey Hussle cu 60 aña te bida den prison, despues di scucha declaracionnan di e costo inmenso di e asesinato di e strea di hip-hop y lider di bario, y di e malesa mental, abuso y problema di bida largo di e homber cu a tir’e.
Hues di Corte Superior, H. Clay Jacke II a duna e sentencia na Eric R. Holder Jr., 33, kende a ser haya culpable di e asesinato den prome grado na 2019 di e artista di 33 aña nomina pa premio Grammy pafo di e tienda di paña funda pa Hussle, e Marathon, den e bario den sur di Los Angeles unda ambos a crece den circunstancianan hopi similar.
Jacke a sentencia Holder cu 25 aña te bida pa e asesinato, 25 mas pa sentencia di arma di candela, y 10 pa atake cu un arma di candela. El a pone varios otro adicion di sentencia y a duna orden pa otronan core concurentemente. E tambe a duna Holder credito pa e casi cuatro aña cu el a cumpli caba desde e tiramento.
Holder, bisti den e paña oraño di prison, no a reacciona ora a lesa e sentencia, y solamente a papia pa bisa e hues cu e ta compronde e circunstancianan ora a puntr’e.
