Diaranson atardi, un biaha mas e sindicatonan SEPPA y SIMAR a dicidi di lanta e bos di protesta di e trahadonan di e sector di enseñansa contra e cambionan cu nan ta haya cu e mandatario di enseñansa kier impone, sin delibera debidamente, ni tene debido cuenta cu nan punto di bista.

A pesar cu cierto situacion a cambia den Traimerdia, Scol Pa Ofishi (SPO) y EPB mirando e malcontento cu nan ta bin manifestando ultimo siman, pero ainda tin hopi docente cu no ta contento riba e desaroyo cu ta tumando luga den enseñansa.

Traimerdia
Sinembargo, Magaly Brito di SEPPA a señala por ehempel cu den principio, e trahadonan di Traimerdia no ta contra di e cambio cu a wordo haci, di saca e proyecto aki for di enseñansa y laga departamento di Asunto Social encarga di dje. Nan no tin problema cu esey, ya cu nan tin basta tempo discutiendo riba e cambio aki.

SEPPA mes, den representacion di e trahadonan, tambe a tene un encuentro cu departamento di Asunto Social. Esaki netamente pa mustra con si e departamento aki por cuadra bou e ministerio di e mandatario Glenbert Croes. “Nos ta contento toch cu e decision!”, el a bisa.

Pero aunke nan ta contento cu e cambio aki, esaki no ta nifica cu e proceso aki ta bay di un dia pa otro. Actualmente, Croes, kende ta keda encarga cu Traimerdia, ta na spera di e conseho cu nan mester haya for di departamento huridico, pa asina por continua cu e proceso di cambio. Pero pa e parti financiero di presupuesto, esey ta cay den ministerio di enseñansa, pero esaki no ta nifica cu na nivel di gobernacion por tin acuerdonan pa atende cu esaki.

SEPPA sa caba for di e kehonan cu nan ta bin ricibiendo di e trahadonan di Traimerdia, caminda nan ta wordo yama pa wordo ofreci trabounan diferente cu un miho pago. E ta haya cu ta un lastima cu e cos aki ta tumando luga, ya cu ta pone den peliger e existencia di Traimerdia, y e tin derecho di existencia.

SEPPA a entrega un keho na prome minister Wever-Croes ya cu e tipo di maniobra aki, nan ta bin experenciando den e ultimo aña y mei ultimo. Tambe e sindicato a adverti Parlamento y Conseho di Minister riba e tipo di maniobra aki, segun Brito.

Cobransa
Otro punto keho tin di haci cu e trahadonan di Traimerdia a cobra placa pa 40 ora en bes di 31 ora. Mientras cu nan no merece, ya cu nan ta un ‘opvang’ y nan no ta cay den un nivel di enseñansa regular di 40 ora di trabou pa siman. Brito a cualifica esaki como un ‘locura’. SEPPA ta duda cu instancianan manera Departamento di Recurso Humano (DRH), cu den pasado a yega di atende e asunto aki; y tambe otro profesionalnan den administracion publico, cu a percura pa Traimerdia por a haya su derecho di existencia formal, ta involucra cu e keho aki. Pues SEPPA no ta kere cu nan a bin cu e proyecto aki contra tur nos leynan.

E ta haya cu Lampe a bin cu e ultimo argumento aki claramente pasobra e mandatario aki no ta contento. Segun Brito, Lampe su intencion tabata pa bin cu un Club Escolar. Te hasta el a yega di cualifica Traimerdia como un crèche. E ta haya cu esaki ta refleha cu e mandatario en cuestion no ta contento cu e reaccion cu e ta bin hayando di e trahadonan aki.

Te hasta e trahadonan ta sinti cu e minister aki ta uno capaz di comete acto di persecucion. SEPPA ta alerta riba cualkier tipo di persecucion, ya cu e acuerdonan ultimo cu nan a yega na dje ta directamente cu prome minister di Aruba, kende ta na cabes di un gobernacion.

SEPPA ta desea di sigui negosha cu Wever-Croes, ya cu nan no ta di acuerdo cu e actitud cu Lampe a demostra cada biaha, di impone. El a indica cu no solamente trahadonan di Traimerdia ta bisa cu e mandatario kier impone riba nan, pero tur otro grupo tambe ta indica mesun cos.

E sindicato a mustra prome minister cu pa loke ta trata Traimerdia, tin decision cu ainda mester tuma luga na corto plaso. Nan ta dispuesto di sostene e mandatario, ya cu e trahadonan kier trankilidad. Nan ta haya cu tin un cantidad di buraco cu ta permiti pa bin cu un cantidad di maniobra den Traimerdia, y nan kier cu e buraconan aki por wordo cera. “E servicio aki tin tur derecho di existencia,” segun secretario general di SEPPA.

SIMAR
Presidente di SIMAR, Joseline Albertus a declara cu e maestronan ta vocifera nan malcontento contra Lampe y SIMAR ta sostene nan.

SIMAR ta cualifica e carta entrega tanto na Parlamento como na gobierno como un ‘mocion di desconfiansa’ pa mustra nan con grave e situacion ta.

Albertus a laga sa cu e trahadonan di e sector di enseñansa no ta hayando oido. “Esey no por! Nos tin cu bin mas pisa riba dje pa mustra cu nos no ta contento, y nos no ta bay acepta esaki”, el a declara.

 

LEAVE A REPLY

Please enter your comment!
Please enter your name here