Regla e subsidio di salario (loonsubsidie) pa ley, pero tambe percura cu ta mantene e derecho di dunado di trabou pa pidi retiro di trahado. Esey ta un di e recomendacionnan di Conseho Social Economico, SER, duna na Gobierno.

 

E conseho aki ta basa riba peticion di Minister pa Asuntonan Financiero y Economia, Xiomara Maduro cu kier regla e loonsubsidie pa medio di landsverordening. Awor aki e areglo ta cay bou di dos decreto Ministerial.

Segun SER, e problematica di Covid19 a afecta Aruba mescos cu tur otro pais rond mundo. Sinembargo e impacto pa Aruba tabata hopi mas grandi mirando cu turismo practicamente ta e unico pilar economico di e isla.

 

A tuma diferente medida pa bringa e pandemia mes. Entre otro a sera frontera di Aruba, a bin cu Shelter in Place, Toque de Queda y limitacion di actividadnan di horeca, particularmente bar y restaurant.  Door di e medidanan aki, sinembargo, hopi compania a mira un caida substancia den nan entrada. Aunke cu a stop hopi di e medidanan aki, e lo tuma hopi tempo prome cu por yega na un recuperacion economico.

 

Loonsubsidie

Den luz di e consecuencianan di tur e medidanan y tambe e pandemia, Gobierno a considera di vital importancia pa duna sosten economico y financiero na empresanan durante e crisis aki, mirando. E sosten ta pa yuda sigui paga un parti di salario. Di e forma aki por mantene particularmente cuponan di trabou den e situacion excepcional aki. Gobierno ta di opinion cu e forma di loonsubsidie ta contribui na mantencion di poder di compra cu di su banda ta stimula recuperacion economico.

 

Pa e calculacion di e salario y suma di salario, a uza e cifra registra na SVB te cu 15 di Maart 2020. E salario maximo ta 5850 florin pa luna. E subsidio ta pa 60 porciento den caso cu e produccion di empresa a baha cu 100 porciento.

Pero tin condicion, entre otro cu no por kita trahadonan for di trabou si ta haci uzo di e areglo.

 

Gobierno a regla e subsidio pa medio di dos decreto Ministerial (MB), pero mirando cu kier considera e subsidio aki como un regalo, mester pon’e e subsidio den un ley. Particularmente pa cumpli cu e Ley di Comptabilidad di 1989. E scoge pa regla e proceso pa medio un landsverordening y como tal, e Minister encarga, Xiomara Maduro a pidi SER su conseho riba e areglo di subsidio di salario pa medio di ley. E peticion a drenta dia 18 di Juni y a cuminza trata e proposicion di ley dia 23, cu ta ilustra e urgencia y importancia di e areglo aki.

 

SER por haya su mes den e proposito di Gobierno pa formalisa e areglo di subsidio di salario temporal pa medio di ley, segun articulo 28, inciso 1 di  e Ley di Comptabilidad. Tambe ta sostene e obhetivo, esta pa yuda trahadonan y empresanan. Particularmente pa sostene companianan mantene mas tanto cupo di trabou y duna nan e oportunidad pa keda cu nan personal cu tin experticio y conocemento.

 

Recomendacion

Sinembargo, SER a agrega un serie di recomendacion cu no ta aparece den e dos decretonan Ministerial di Minister Maduro. Na e momentonan aki, SVB ta ricibi e peticion pa loonsubsidie, y e Minister a anuncia cu e proceso ta controla pa Centraal Accountants Dienst, Contraloria General y hasta Colegio di Supervision Financiero di Aruba, CAFT.  SER ta conseha pa un grupo di trabou of comision specifico keda encarga pa supervisa y controla e administracion, otorgamento y pago cu SVB ta haci.

 

Pa por aplica pa e loonsubsidie, SER ta haya cu no ta necesario pa dunadonan di trabou yega na un acuerdo individual cu trahadonan. SER ta di opinion cu si 70 porciento di e trahadonan ta aproba e areglo, anto esey ta suficiente pa por aplica y bin na remarke pa e subsidio.

E empresanan cu ta ricibi loonsubsidie no por ta permiti pa paga dividendo na accionistanan durante e periodo cu ta ricibi e subsidio.

 

Empresanan cu ta kere cu nan ta y lo experiencia un caida di nan produccion empresarial cu por lo menos 25 porciento, lo mester demostra esaki cu un declaracion di accountant.

 

Retiro

E obhetivo di e subsidio di salario ta pa mantene cuponan di trabou. Pero asina mes, SER ta di opinion cu dunadonan di trabou mester por keda cu e derecho pa por pidi retiro di un trahado. Mester trata e peticion denter di un luna. Y si ta permiti e dunado di trabou pa retira e trahado basa riba motibonan di operacion, e empresa lo no ricibi e subsidio pa e trahado ey mas. E lo sosode na momento cu e dunado di trabou haya e permiso pa duna e retiro.

 

Tambe SER kier un pa duna un claridad riba of un descripcion cla  di kico ta entendi bou reduccion di orario di trabou.

 

SER positivo

Den luz di henter e crisis economico, SER como tal ta conseha positivamente pa regla e loonsubsidie pa medio di ley, bou entendimento si cu ta inclui su recomendacionnan.

E loonsubsidie cu empresanan a ricibi recien tabata paga pa reservanan di Aruba mes. Esaki pa motibo cu te ainda no a yega na un acuerdo (nobo) pa e di tres tranche di sosten di likides for di Hulanda. A paga e prome subsidio di salario na Mei y te cu Juli a paga 85 miyon florin en total. Un averahe di mas di 26 mil trahado a probecha di e subsidio aki.

 

SER

SER ta e Conseho Social Economico cu ta consisti di representantenan di dunadonan di trabou y organizacionnan di trahado (sindicatonan). E Presidente actual ta Sra. Tisa LaSorte y e Secretario General ta Felis Bijlhout. SER ta un organo di conseho independiente cu tin su base riba ley, y por duna conseho na Gobierno, sea cu ta pidi of no.

 

Reforma

Mester bisa cu tanto Asociacion di Industria y Comercio di Aruba, ATIA y Camara di Comercio ta kere cu ta ora pa Gobierno bin cu reforma laboral, pa asina permiti empresanan reorganiza nan mes pa asina evita cu nan ta kibra completo.