Facebook ta drentando mundo di streaming di wega, siguiendo e pasonan di Sony, Microsoft, Google, Amazon y Nvidia. Tur awo ta ofrece maneranan pa hende hunga weganan visualmente compleho di console y PC riba internet, usando tecnologia similar na esun cu cual Netflix ta stream pelicula.
Mientras mayoria di compania ta enfoca riba weganan di prome division manera e wega di accion di Take-Two, Grand Theft Auto V; of e proximo wega di Ubisoft, e titulo di ficcion historico, Assassin’s Creed Valhalla, Facebook ta bisa cu lo enfoca riba weganan mobil.
E servicio nobo di Facebook, cual ta parti di su proyecto Facebook Gaming, lo ofrece hende acceso na weganan pa smartphone manera Asphalt 9: Legends di Gameloft sin e necesidad di download of instala un app. Na luga di esey, Facebook a bisa cu hende por hunga e weganan aki riba un computer a traves di su website Facebook Gaming of su app di Facebook riba aparatonan cu ta usa software Android di Google.
Mientras cu Facebook lo pone su tecnologia disponibel pa computer y celular cu ta usa Android, e compania a bisa cu e restriccionnan di Apple cu ta rekeri, entre otro, pa proveedornan di cloud gaming entrega cada wega na su team di revision ta nifica cu pa awo, e servicio no lo traha cu iPhone.
“Mientras cu nos caminda cu iOS ta incierto, un cos ta cla. Apple ta trata weganan diferente y ta sigui eherce control riba un recurso hopi precioso”, segun Jason Rubin, vicepresidente di play na Facebook, a skirbi den un blog post dialuna anunciando e servicio.
E movida di Facebook ta marca e esfuerso mas recien di e gigante di red social pa aumenta e cantidad di hende cu ta bay cerca dje pa gaming, un di e industrianan mas grandi y creciendo mas rapido mundialmente. Parti di e motibo pa e exito aki ta e explosion di weganan conecta na internet, permitiendo titulonan manera Fortnite atrae centenares di miyones di hungadonan pa competi contra otro den un battle royale.
Sinembargo, e weganan no ta bay djis pa hunga. Hende tambe ta mira otro y ta competi riba YouTube y servicionan di transmision en bibo manera Twitch di Amazon y e servicio di streaming di Facebook tambe. Y ora nan no ta haciendo esey, hende tambe ta usa weganan pa topa digitalmente cu amigonan, convertiendo nan den un sorto di red social.
E pandemia di coronavirus, cu a infecta mas di 42 miyon persona rond mundo y cobra bida di mas di 1.1 miyon persona, a conduci na un serie di lockdown ordena pa gobierno. Cada bes mas hende ta mira videogames como un salida, aumentando su uso significantemente, segun proveedornan di servicio di internet y fabricantenan di weganan ta bisa.
