Home Local Setar gate: sospecho Koolman den detencion

Setar gate: sospecho Koolman den detencion

6686

E sospechoso Egbert ‘Yvan’ Koolman di e estafa miyonario na Setar cu bendemento di celular (Setargate), ta den detencion. E informacion aki ta for di e ultimo desaroyonan di e caso di corte andando na Miami.

Tin 25 sospechoso bou di cual tambe ex casa di sr. Koolman, Evarina Koolman Hart. E caso aki a bin dilanti den e scandal financiero mundial conoci bou Panama Papers. Sr. Koolman lo a haci uzo di servicio di e bufete di abogado Mossack Fonseca (MF) pa crea un compania offshore y asina sistematicamente fix su mes.

Manera Bon Dia a publica, e caso lo sigui tratamento na juli. Sr. Koolman ta acusa di defrauda e compania nacional Setar den un periodo di 10 aña miyones di dollar, aceptando soborno di proveedornan di telefon mobil situa na e parti zuid di Florida. E Arubiano lo a cera contractnan na prijsnan infla, cual lo tabata 20% mas caro cu e prijs di mercado y na su turno tabata wordo recompensa. Te ainda no ta cla cuanto placa exactamente ta supuestamente. A keda constata tambe cu e aparatonan tabata ‘refurbished’ y algun tabata hasta contene material pornografico.

 

Setar a tene un conferencia di prensa despues pero hopi pregunta a keda habri. Entre otro e parti di recompensacion di clientenan di Setar. E compania si a confirma den un relato cu na 2014 a ricibi un ‘cantidad limita di celular cu tabata re-furbished y cu appnan no apropia den nan y mesora a saca esakinan for di lote pa benta’. “Setar ta garantisa cu tur celular y productonan cu Setar ta bende na cliente ta di halta calidad y cu na ningun momento lo permiti productonan cu no ta original”, asina nan tambe a declara. Pero riba e preguntanan concreto di cuanto celular a bay riba mercado local y si nan a recompensa clientenan, te ainda falta un contesta.

Tampoco a contesta e pregunta dicon no a entrega un keho na husticia Aruba. Sr. Koolman ta biba na Florida y e otro sospechosonan di companianan envolvi tambe ta situa na e estado Mericano aki. Sinembargo e tabata traha na e compania na Aruba e tempo ey y na e momento cu e fraude a tuma luga.

 

Keda sin contesta
Tin mas pregunta cu Bon Dia a haci cu a keda sin contesta. Riba 23 di maart nos a entrega entre otro e preguntanan na Setar:

1) Con bin a permiti pa laga e responsabilidad di compra den man di 1 solo persona?
2) Kico precies e conseho di supervision ta controla ora nan haya sumanan di riba 100 mil florin pa aproba?
3) Nos tin declaracion di un fuente anonimo cu FBI a haci bishita na Setar na december, pakico esaki a pasa y kico a haya?
4) A compronde cu na december ora a retira e empleado a yega na un acuerdo cu ne pa no bay OM. Si ta papiando di sumanan cu ta core den miyones, pakico a yega na e acuerdo aki?
5) Ta bay tin consecuencia pa e director ya cu bou su maneho a permiti esaki pasa?
6) Con ta eligi conseho di supervision y cada pasa cuanto tempo?