Setar benta Samsung defecto (NP) (1).jpg

Bon dia Aruba a puntra Setar si ya nan a cuminsa bende e Galaxy Note 7 cu ta pasando den un ‘global recall’  tecnologico grandi di e compania Samsung. Suzy Maduro encarga cu e departamento di comunicacion di Setar a bisa cu segun e ta na altura, Setar no a cuminsa bende e modelo di telefon aki ainda.

 

A puntra Sra. Maduro con e compania normalmente ta atende cu fayonan of defectonan y con Setar ta investiga si esaki ta fayo di e compania of no. El a splica cu Setar tin un “Repair Center” cu tin nan proceduranan. Si un telefon no ta trahando, bo ta acudi na e departamento aki y depende di ki telefon bo tin, bo ta haya un buki di garantia di 3 luna. E ta splica cu e garantia aki ta pa fout di fabrica y ta cubri cierto cosnan. Si un hende bay landa cu e telefon y e ta daña, no ta reemplasa esey. Na momento cu detecta cu e ta un fout di fabrica e ta wordo reemplasa, y si no tin e mesun modelo, e ta wordo cambia pa uno ekivalente den consulta cu e cliente. “Cada caso ta diferente  pero den principio esey ta e procedura. Masha tiki e ta pasa si, pasobra normalmente nos tin cu programa e celular.”

Pantaya kibrando hopi lihe

Awendia telefon ta un instrumento hopi importante den operacion diario di hopi hende. E ta importante pa e ta funciona optimal. Lamentablemente e pantayanan grandi cu ta hopi gusta di e telefonnan ta core riesgo pa cay y kibra hopi lihe. Un ciudadano a conta Bon Dia Aruba con ta di 3 biaha caba cu e ta cambia screen di su smartphone cu a kibra y algo a resalta. E screen original cu e telefon ta bin cun’e ta mustra di ta hopi mas fuerte cu esunnan reemplasa, aunke cu e no por husga esaki pa medio di solamente djis wak e.

 

 “E telefon a cay varios biaha prome cu e glas a ‘crack’ e prome biaha,” el a bisa. “Unabes mi a cambia e glas original, ta biaha el a cay y el a bolbe kibra.  Mi a hib’e drecha 2 biaha mas despues te cu awo el a cay y a kibra e glas y e daño a bay te na e LCD screen.” E persona a bay e mesun compania pa drecha e celular tur e biahanan aki cu costo di casi 300 florin pa glas kibra cada biaha y ultimo rond di 400 florin pa glas y LCD screen kibra. E persona ningun biaha a bay Setar pa drecha telefon y semper a busca companianan den caya of riba Facebook pa haci esaki. Motibo tras di esaki ta simplemente e costo y e hecho cu e ta haya e telefon lihe (mesun dia).

Bon Dia Aruba a puntra Sra. Maduro si nan ta experiencia cu hopi di nan clientenan ta haci uzo di e servicionan di nan repair center pa drecha un glas kibra etc. El a bisa cu e ta depende, pasobra e ‘parts’ di e telefon ta costa placa y si nan tin nan garantia sigur nan ta bin na Setar, sinembargo si e telefon ta poco mas bieu, hopi biaha nan ta bay na otro luganan y si otro hende coba aden e ta bira mas dificil pa otro tecnico traha riba dje, el a splica.

 

Pa loke ta e prijsnan nos a haya informacion cu e ta costa casi 700 florin pa drecha un Iphone 6s na e repair center di Setar, y nan ta keda cu ne 3 dia, pa verifica cu e ta traha bon y nan ta enfatisa cu ta producto original ta wordo uza y no uno barata of descontinua. Pa casi mita prijs otro companianan ta drecha e mesun marca di telefon aki y bo ta hay’e algun ora despues, akinan no tin un sistema di garantia y tampoco tin informacion di e calidad di piesa uza.

Situacion recall

E siman aki Samsung a haci un recall pa e modelo di telefon Samsung Galaxy Note 7 cu luna pasa a sali riba mercado. E motibo tras di e recall aki ta bin despues di a investiga diferente caso cu bateria di e telefon a explota. E fayo ta en e bateria cu ta haci cu electrolodes negativo y positivo ta bin den contacto cu otro cual no ta normal 2.5 miyon telefon a wordo exporta desde cu el a lansa y ta calcula cu lo costa e compania 1 biyon dollar.

 

E suma aki ta zona hopi, pero segun Techcrunch.com esaki ta un porcentahe hopi chikito den entrada di e compania. Sinembargo e percepcion di publico y confiansa den nan producto ta mas locual cu nan ta haciendo esfuerso pa mantene. Special si tene na cuenta cu Iphone 7 ta planifica pa wordo revela oficialmente awe nochi na e evento anual di Apple na San Francisco.