Ayera mainta den conmemoracion cu Dia Internacional di Libertad di Prensa, Sharina Henriquez periodista investigativo coresponsal internacional di e website Caribish Netwerk den un conferencia di prensa a trece dilanti un actualisacion di su caso contra libertad di prensa cu a tuma luga mas di un aña pasa.

Na luna di maart di aña pasa ora Covid-19 a drenta na Aruba y gobierno a dicidi di implementa medidanan pa evita plamamento di e virus, tambe a implementa toque de queda na unda for di comienso, periodistanan di varios medio di comunicacion local no por a eherce su trabou riba caya manera mester ta den oranan di anochi.

Tabata dia 22 di maart ora toque de queda a cuminsa cu Henriquez tabata riba caya trahando, despues cu orario di e medida aki a cuminsa na caminda el a topa cu polis e cual a bis’e cu e tin cu keda deteni y mester bay na warda di polis pa via cu e no cumpli cu e medida aki cu tabata pa evita mas casonan positivo di e virus, aunke Henriquez tabatin un carta di su dunado di trabou e cual tabata informa cu e ta un periodista. Igualmente el a ricibi un multa di 1.000 florin.

Ayera dia tres di mei un dia masha importante pa libertad di prensa internacionalmente, periodistanan ta para keto y tambe por a mira den mundo cu esaki ta bou atakenan specialmente den periodo di Covid-19 y tur e medida cu gobierno a impone, Henriquez a sigura cu e medidanan aki di un banda ta proteha e comunidad pero di un otro banda e ta bay leu tambe, “y si nos no ta watch out, esaki ta bira algo como un normal nobo di berdad”, el a expresa.

Libertad di prensa ta un pilar di democracia y segun Henriquez a menciona ta hopi importante, ademas cu e no ta bay acepta actonan contra esaki si esaki lo bira algo normal.

Para dilanti di warda di polis di Santa Cruz, Henriquez a informa cu e tin un keho entrega for di aña pasa caba na unda el a informa cu el a wordo deteni di un manera falso legalmente, te ainda polis no a actua riba e keho cu Henriquez a entrega, e ta wardando pa un cita cu halto comisario di polis Vanessa Tjon Kock.

El a trece dilanti cu den registro internacional di libertad di prensa ‘Press Freedom Index’ Hulanda a baha di luga 5 pa 6, ubica abou di Costa Rica y esaki ta pa motibo di su detencion, “nan por a resolve, tabatin mas di un aña pa resolve esaki internamente sin nada di publicidad” Henriquez a declara esaki pa motibo cu e kier preveni cu lo sucede atrobe.

El a sigura cu tin cuatro partido importante di kico a pasa aña pasa, e prome ta Gobierno di Aruba, di dos ta Cuerpo Policial di Aruba, di tres Ministerio Publico y di cuater Gobierno na Hulanda mes.

“E dos cu si a sinta cu mi, a pidi nan disculpa y a zorg pa esaki a wordo resolve ta Ministerio Publico y Procurador General y mi ta aprecia hopi loke el a haci”, Henriquez a declara.

Asina mes, el a bisa cu su caso a seponeer pero esey no ta nifica cu ainda e no ta registra akinan como sospechoso, “mi kier ta clear, no tin nada riba dje pasobra esaki ta un acto ilegal y procurador general a admiti esaki y tambe el a pidi mi disculpa y el a saca mi datonan for di e registro ey”, Henriquez a comenta.

Tocante esaki, el a señala cu esey a tuma luga 8 di januari ultimo na unda procurador a bisel’e cu e ta bay yama halto comisario di polis pa asina polis tambe haci su parti, pero te ainda nada un pasa.

Parlamentarionan di Hulanda a cuestiona e detencion di Henriquez y tambe otro actonan na Corsou di kico ta pasando contra libertad di prensa, ora Gobierno Hulandes a contesta Tweede Kamer nan a haci un impresion cu segun Henriquez a menciona, e no tabatin papelnan cune pero esey no tabata berdad.

Dianan prome di su detencion, Henriquez hunto cu otro coleganan di prensa a presenta na Berturskaantor pa papia cu prome minister Evelyn Wever-Croes pa bisa cu nan tabata para pa nan derecho, “ora a mi a sali mi tabata para den mi derecho y mi tabatin mi papel”, el a aclaria referiendo na e dia di su detencion.

Loke a pasa ta manera el a anuncia, den Kamerbrief a sali algo cu a duna impresion “masha eroneo mes” cu el a investiga esey y na final VNO representacion di Hulanda na Aruba a duna informacion na Ministerio di Educacion Cultura y Ciencia cu ta encarga cu libertad di prensa na Hulanda cu di e manera ey a contesta e parlamentarionan, lo cual a resolve tambe.

Henriquez tambe a bisa cu siman pasa el a haya un carta di disculpa y lo cual ta cambia ta cu ora nan ta contesta preguntanan di parlamentarionan Hulandes nan ta pone e fuente di na unda e informacion ta sali, den e caso aki loke a bay robes ta cu nan a usa e fuente di Gobierno di Aruba e cual a duna nan un informacion cu no tabata cuadra, segun el a sigura.

Di loke ta trata Gobierno di Aruba, Henriquez a trece dilanti cu ora a impone e medida di toque de queda periodistanan no ta asina importante, na unda nan a wordo hala na un banda pa no haci nan trabou y cu ainda tin un toque de queda cu ta un medida masha pisa mes contra libertad di periodistanan.

“Nos ta perdiendo nos democracia y keda lucha pa nos derecho fundamental, capitulo 1 den nos constitucion”.

Loke Henriquez ta pidi ta pa su caso lo wordo resolve pa motibo cu segun e mes a expresa e no a haci nada fout, polis deten’e y mester a keda cera henter un anochi den cel di warda di polis, pero e no a haci’e pa via cu e situacion na e momento ey tabata hopi peligroso na unda polis no tabata proteha contra Covid-19 y tabatin detenidonan riba otro den un cel, un situacion cu Henriquez no a acepta.

Na Aruba a keda conoci agresionnan y intimidacion pa periodistanan incluyendo Henriquez mes, pa motibo di esaki Bon Dia Aruba a puntra p’e kico mester cambia na Aruba pa por eherce e periodismo manera mester ta, el a contesta cu ora algo ta pasa cu periodistanan, nan mes nan ta lubida esey y par di dianan despues nan ta den nan trabou back, “no haci esaki, internacionalmente ora bo ta wak kico tur e periodistanan ta haciendo awor, prome cos mester registra pasobra e tambe por daña bo entrada y esey ta algo cu ta conta akinan, bin cerca mi, a mi ta willing pa hib’e mas leu”, el a bisa.

E medida di toque de queda a wordo kita na Hulanda, eynan e hendenan sa nan derecho miho, na Aruba e hende no ta tuma nan esfuerso pa conoce nan derecho y “esey ta jammer” el a comenta, toque de queda ta un medida di excepcion pero Gobierno di Aruba ta bisa cu esey ta keda pa motibo cu Aruba ta den crisis “pero un crisis ta algo cortico, un crisis no ta algo manera añanan largo pasobra den paisnan dictatorial nan tambe ta bisa cosnan asina y ta p’esey cu boso tin menos libertad”, Henriquez a enfatisa.

El a sigura cu tin varios organisacionnan internacional y red di periodistanan para na su tras, door esunnan cu ta traha den e parti investigativo pa via cu nan tin hopi informacion oficial pero e parti cu e control riba e ‘data di jornalism’ ta falta.

 

LEAVE A REPLY

Please enter your comment!
Please enter your name here