Diabierna atardi pa 6:30 p.m. a corona Sheqayli Ascencion “Shiki” como Reina Hubenil pa Oranjestad – Grupo Champagne.
Sheqayli no ta un persona desconoci, mirando cu na 2014 el a keda corona como Reina Infantil di Aruba su Carnaval 60.
El a bisa di e tempo ey cu e lo kier ta back riba stage pa asina competi tambe pa Reina Hubenil di Carnaval. Su plannan a wordo alarga door di e pandemia pero asina mes a keda cu su enfoke pa bay pa Reina Hubenil.
Durante di e atardi aki el a bay schrijf in pa eleccion y a sali cu un parada chikito, rumbo pa Patio 15 unda cu el a yega acompaña pa brassband y invitadonan. Mirando e fecha di 3 rey a scoge 3 personahe cu ta di importancia pe pa coron’e, un hoben cu practicamente a lanta hunto cu Shiki y cu a logra su metanan y demostra cu no ta pasobra bo tin retonan fisico no por yega metanan, esey ta Disjonrick Jacobs; hunto cu e talentoso hoben Paul Adisson Croes y su Opa Rodney Westerburger, cu a haci aña e dia ey.
Champagne ta celebrando 25 aña den Carnaval y ta un honor pa representa nan den un eleccion di Reina hubenil di Carnaval.
Linchie Merryweather a pone e sjerp oficial y despues a coron’e. Un danki sigur na Patio15 pa net den entrada di caya principal di nos capital a permiti team Shiki organisa e evento aki. Danki na tur esnan cu a presenta y Shiki ta invita tur hende cu kier apoy’e pa yega dia 21 di Januari den Renaissance convention Center.
