Diamars ultimo na Centro di Bario di Brazil a tuma luga e Show di Dande 2022 despues di dos aña di ausencia bao organisacion di Comision di Celebracion di Dianan Nacional di Departamento di Cultura, Fundacion Chico Harms y Unoca.

E actividad tabata conta cu un participacion grandi di 17 grupo manera a wordo informa, ken cu nan musica folklore a deleita e publico presente cu nan dande cu ta pertenece na cultura di Aruba y su tradicion di fin di aña.

E participantenan tabata Tipico Tradision Musical, Ivy y su grupo/Alissandra, Tipico Quivarco, Tipico Pegasaya, Tipico Facundo, Flor di Pasco Aguinaldo, Grupo Nos Folklore, Tipico Shelo y Tera, Tipico Palisia, Grupo Luis Maduro, Tipico Un Brindis, Tipico Brisa Tropical, Tipico Melodia, Tipico Sonido di Antaño, Tipico Ayo y Tipico Stimami.

Esaki tabata un demostracion di e tradicion aki caminda ayera anochi tambe tabata tumando luga e festival mes den categoria infantil y hubenil cu e participacion di 19 mucha y hoben entre 4 pa 17 aña di edad dividi entre 7 agrupacion musical, esaki a tuma luga na Centro di Bario Tanki Leendert for di 7or di anochi, ganadonan lo wordo publica den otro edicion di Bon Dia Aruba.

Awe 29 di december festival di adulto ta bay tuma luga na Club Caquetio pa asina ey celebra 50 aña di e celebracion aki.

E dos festival y e show mes a haya sosten grandi, pa motibo cu UNOCA a ripara cu “pa cada aña ta bira un challenge pa cada organisacion keda nan mes na nan mesun standard na nivel nan cu publico di Aruba ta expect di loke ta e show y presentacion cu ta wordo duna, pero tambe di loke tin di haber cu organisacion y logistica di e festivalnan, esey tabata un motibo hopi importante pa nos sostene e festivalnan aki pa nos por mantene e nivel y pa nos por sigui mantene e tradicion di nos Dande.” Director di Unoca Ray-anne Hernandez a bisa.

Dande tin su origen den e tambu Africano y ta mustra similaridad cu otro estilo Afrocaribeño. Ora esclavonan di Corsou a bin na Aruba nan a trece e tambu cu nan, Dande a nace alrededor di aña 1880 ora esclavonan a wordo libera y nan a cuminsa toca tambu y bishita e casnan na Aruba pa desea e comunidad un bon aña nobo.

E nomber Dande posiblemente ta bin for di e palabra Spaño Dandare cu ta nifica “bay di un luga pa otro”, Dande ta parti di e folklore di Aruba y no ta wordo haya na ni un otro luga di e Caribe.

E paranda ta activo for e bispo di Aña Nobo despues di tiro te e celebracion di Reyes e dia 6 di januari.