NG Yakari.jpg

NG Yakari.jpg

Mi hendenan! Pa ora e articulo aki yega cerca boso ami lo ta den klas haciendo mi examen di Change Management pa di 4 biaha caba. Asina mes. No shame in my game, pero ainda min logra pas’e. Ban bek struggle, pero bon, ban papia! Pa hopi dia mi kier a skirbi tocante e caso di Kyrenne Croes.

No solamente e, pero tur otro hoben kende AZV a nenga un oportunidad pa recupera y laga nan pa bondad di pueblo. Ultimamente tur cos ta sali di pueblo, pa pueblo. Ta manera nos ta goberna nos mes tambe. Desde cu a cuminsa traha oficialmente na Aruba mi ta paga AZV y mi a cuminsa traha na un edad hopi jong. Aunke masha poco mi a haci uzo di dje mi ta consciente di e privilegio di un seguro medico. Pero! esey no kiermen cu nos no por papia di su fayonan. Bayendo bek na Kyrenne, mi ta sigui e caso di cerca pasobra e hobencita aki tabata bay La Salle cu mi. Nos no tabata necesariamente amiga, pero mas bien nos tabata tin amiganan en comun y varios biaha nos a hari hunto. Kyrenne ta lief, alegre y stima pa su amiganan. Y si duele mi tin di locual a pasa Kyrenne, mas duele mi tin ainda na e echo cu Aruba simplemente no ta duna hobennan e prioridad cu nan merece.

Mi kiermen, e hoben aki tin un bida henter su dilanti. Un bunita yiu pa cria y bo ta bisa mi cu AZV ta nenga di duna todo por todo pa e recupera? Letterlijk horta su chens di mehora y re integra den nos sociedad. Ta asina nos ta balora nos hobennan? Tanto poder di hubentud, tanto award show aki aya y ora di berdad nan mester di nos, nos ta halanan un banda? Asina nos hobennan ta achieve algo ta tur minister ta core pose cu nan! “Orguyo! Yiu di tera! Biba nos hubentud!” Anto bo ta bisa mi cu e hoben aki cu tin full su bida pa biba – si ta pa AZV e ta bay keda riba un cama? Sabiendo cu tin opcion y tin manera pa e recupera? Si ministernan por para pa Xander, pa Jeon, pa tur esunnan cu a logra. Nan por para pa Kyrenne tambe cu di berdad mester ayudo.

No por ta asina cu nos ta give up riba nos hobennan asina lihe. No por ta cu un seguro universal cu tur hende ta paga, Kyrenne ta wordo enfrenta cu un no. Nos tin gobierno nobo, mensen. Mi a wak boso nan talk the talk, now walk the walk tambe. Kyrenne mester di e miho cuido medico posibel pa e recupera, no solamente e mester esaki, e simplemente tin derecho riba dje. Nos tur ta paga pe. Nos ta papiando di nos mesun hobennan cu mañan ta encarga di nos isla. Si nos no cuida ‘nan, ken lo haci esaki?