Diasabra un mucha a cay for di un di e weganan na Interpark Coney Island y herida su mes. Gobierno hunto cu instancianan concerni a yega na decision pa stop e operacion di e lugar en cuestion pa 48 ora. Esaki pa duna espacio na DTI pa bolbe hasi e controlnan necesario pa cu e seguridad pa e bishitantenan.

E pregunta a wordo haci na KPA con por a duna permiso pa opera na e Coney Island menciona y e contesta ta cu KPA a para riba cu tur atraccion mester a wordo controla pa ​DTI prome cu duna permiso pa e habri, locual a causa un tardansa extra pa e por a habri. Ta te ora cu ​KPA a haya un conseho positivo di DTI, KPA a permiti esaki habri pa publico. Esaki nos a wordo informa por medio di un comunicado di Cuerpo Policial cual ta sigui bisa: “KPA ta sigura pueblo cu nos lo sigui traha hunto cu otro instancianan pa asina garantisa cu e proceduranan di seguridad ta wordo sigui pa pueblo por ta safe.”

Investigacion riba aparato y personal
Minister di Husticia mr. Andin Bikker (POR) den consulta cu Minister encarga cu DTI, Sr. Otmar Oduber (POR) a yega na e decision pa stop e permiso di Coney Island pa 48 ora. E decision aki a wordo tuma, pa motibo cu diasabra anochi un mucha cu a bay slip, pa un motibo of otro a sali for di e slip y cay. Debi na e caida, e mucha no por a move su curpa. Cu ambulance a transporte mesora pa hospital. Despues di e incidente lamentabel aki Minister Bikker a inicia un investigacion pa sa kico exactamente a pasa cu e mucha por a cay for di e slip diasabra anochi. Lo bay haci investigacion na e makinaria cu e mucha a cay for di dje pa mira si e ta safe pa pone atrobe den uzo. Un otro exigencia den e investigacion ta riba e personal cu ta yuda e bishitantenan pa subi den un di e aparatonan aki. E personal mester sa bon con pa traha cu e makinaria pero tambe duna bon servicio y mantene siguridad di esunnan cu ta subi un di e atraccionnan. Bida di un persona ta hopi importante. Minister Bikker kende a pone su mes na altura di loke a pasa diasabra anochi, a dicidi di tuma un decision serio y decisivo pa cera Coney Island no solamente parcialmente pero full. Cada mashin y cada personal lo bay pasa den un investigacion pa asina por sigura cu Coney Island di tur manera ta safe, specialmente pa e muchanan cu no ta tene nan mes na instruccion di e personal. Hopi biaha e muchanan ta para of haci wega peligroso cu nan no mester haci ora nan ta subi un di e makinarianan aki.   Despues di 48 ora cu Minister Bikker haya e rapport  di e investigacion for di DTI y KPA, lo evalua si lo bolbe duna e permiso na Coney Island pa e por sigui cu su servicio di entretene grandi y chikito.