E deliberacionnan cu Hulanda no a yega na un final abrupto ayera. Gobierno di Aruba no por a entrega un palabra final considerando cu tin varios asunto unda no a caba di delibera, tanto na Aruba como cu Hulanda. Esey ta logico tambe mirando e peso di e temanan entama, cu ta haci dificil pa trata nan den un tempo asina cortico y enfrenta Hulanda cu contestanan contundente riba tur e temanan aki. Di e manera aki ta posterga e decision, kico exactamente ta bay pasa, pa aki un luna, ora gobierno di Hulanda ta continua trabao despues di reces di verano.

Esey ta trece un pausa necesario pa sigui defini kico exactamente ta e posicion cu Aruba ta scoge encuanto e exigencianan di Hulanda, y kico lo por cambia o suavisa den e esakinan. Sin embargo, tempo ta keda preta pasobra un luna tambe ta pasa masha rapido mes, y e ora e contestanan mester ta cla. Y, ademas, tin un otro aspecto na e asunto aki, y esey ta cu den e luna aki lo mester cuminsa discuti e temanan cu Hulanda a trece dilanti entre nos mes. Na promer momento a contempla e exigencianan Hulandes na un manera masha rigido como exigencia sin mas, mientras cu mester ta posible discuti nan na un manera tranquil y racional. Esey ta implica si cu pa di tantisimo biaha nos ta bay discuti varios di e temanan aki, y si nos ta keda yega na e mesun argumentonan, sin avanza den direccion di algun apertura cu ta hiba nos dilanti, nos no tin solamente un problema cu e Hulandesnan, sino cu nos mes tambe.

Nos tin miedo cu tur energia ta bay den e defensa, o ataque, contra Hulanda, y cu no tin espacio pa puntra nos mes kico ta realmente loke mester sucede riba tur e puntonan cu ta bin dilanti den e, mientras tanto famoso o notorio, pakete cu Hulanda a manda nos. Poniendo e asunto di ‘exigencia’ un banda, ban pensa di cada tema kico ta realmente deseable y realistico, independiente di e hecho cu e ta yega na nos awor a traves di e documento Hulandes aki. Nos ta kere cu ta esey nos mester haci, y nos ta cuminsa awor. No cu nos ta bay cubri tur asunto aki, pero si un di esunnan mas importante.

Esey ta nos aparato gubernamental cu ta, esey nos por ta di acuerdo cu otro, demasiado grandi y a bira caba practicamente impagable. Pregunta ta: kico lo a sucede den e proximo añanan si nos no a haya e reciente advertencia aki di Hulanda? Segun nos opinion: nada! Nos lo a sigui mors den margen di e asunto, practicando loke na varios ocasion nos a yama ‘manicure’ di banda di gobierno, cu manera un miedo panico pa atende e asunto aki di manera mas riguroso. Nos tabatin un aprecio momentaneo ora cu algun tempo pasa e mandatario concerni a confronta e sindicatonan cu e payroll di mas di 7.000 cupo pa cual gobierno ta responsable pa cada dia 24 di luna percura pa e salarionan ta na banco. Nos mester a recorda e comunidad si cu e mandatario a lubida e cantidad di salarionan di sector subsidia cu tambe ta un compromiso fiho cu gobierno no por ignora, haciendo e total mas di 8.000 y costando mas di 50% di e presupuesto total. Bo por haci den e sector aki manera gobierno anterior a haci silenciosamente, cortando drasticamente den e sector, cu consecuencia serio pa atencion social subsidia. Pero esey talvez tampoco ta e manera pa hacie.

E problema cardinal ta keda: kico nos mes lo haci, si no tabatin un Hulanda cu ta ‘menasa’ nos politiconan awor, cu “si nan no ta hacie anto nan ta bin hacie pa nos”. No tabata esey loke un miembro di Contraloria General a expresa algun aña atras den parlamento, y cu hopi di e parlamentarionan a sinti nan ofendi pasobra tabatin un hende cu e curashi pa bisa nan den nan arena cuant’or tin? A lubida e asunto y tur cos a keda ‘business as usual’ pasobra aparentemente no tin nada mas dushi cu desperdicia placa di otro, anto pa colmo sin cu bo mester duna cuenta… Segun nos humilde opinion, e dia a yega cu nan ta dispuesto pa bin hacie pa nos. Y ora nan bin hacie, nos mester por expresa algo mas cu un estupido grito di “nan ta mishi cu nos autonomia”. Y ta bon pa pensa tambe cu na ningun di e islanan Hulandes den Caribe a yega di sucede cu un gobierno local mes a reforma manera mester den un asunto asina; na Curaçao ta e mesun Hulandesnan aki a haci ‘opruiming’ den e aparato gubernamental, a cambio di saneamento di nan debe biyonario.

Como Aruba, nos ta para na e mesun rand di e abismo cu e otro islanan tabata na 2010, pero sin e posibilidad di ‘delete’ sikiera parti di e debe, asina ta cu algo mester sucede. Y e pregunta clave aki ta: cuanto hende tin den e lugar aki ainda cu honestamente ta kere cu un partido politico na Aruba ta bay reduci nos debe publico te na proporcion aceptable, y de paso ta reduci nos aparato gubernamental na igual proporcion aceptable?

LEAVE A REPLY

Please enter your comment!
Please enter your name here