Recientemente, Parlamentario di Fraccion di MEP, drs. Shailiny Tromp-Lee, a manda un carta formal dirigi na Minister di Asuntonan General, Cultura, Medio Ambiente y Naturalesa, sr. Mike Eman, pa medio di Presidente di Parlamento.

E iniciativa aki ta busca pa haya informacion completo y transparente tocante e progreso real di e Programa Nacional di Reforestacion di Aruba.

Durante e apertura di e aña parlamentario 2026-2027, Gobierno a reafirma e compromiso cu e programa aki y e meta pa planta 100.000 mata na Aruba cu e participacion di 27 organisacion local. Pa Parlamentario Tromp-Lee, e iniciativa aki ta rekeri un siguimento estrecho: “Un mata planta no ta un resultado si despues no tin awa, cuido y mantencion pa e mata sobrevivi y crece”.

Cu e obhetivo pa Parlamento por ehecuta su tarea di control y pa pueblo di Aruba conoce e uzo di recurso publico, e parlamentario a formula un serie di pregunta detaya parti den varios punto clave:

Progreso real y tasa di sobrevivencia: Ta puntra cuanto di e 100.000 matanan a wordo planta te cu awo, cuanto ta bibo y den bon condicion, cua ta e porcentahe di sobrevivencia y si tin un plan di evaluacion na 6 luna, 1 aña, 2 aña of 5 aña.

Costo y recurso publico: Ta pidi un lista y detayenan completo di e costonan total te cu awo (compra di mata, preparacion di tereno, awa, transporte, mantencion, supervision y reemplaso).

Ubicacion y tipo di especie: Tromp-Lee ta pidi un lista y mapa digital cu e ubicacionnan, como tambe e specificacion di cuanto mata ta especie nativo (endemico), di fruta of otro tipo.

E 27 organisacionnan y nan aporte: Ta pidi pa aclaria e rol concreto, si nan aporte ta financiero, den material, personal of recurso, y si algun di e organisacionnan aki ta ricibi pago, subsidio of contrato di Gobierno.

Procedura di contratacion y mantencion: Ta pidi claridad riba e proceduranan di contratacion cu a uza (oferta publico, contratacion directo, etc.), ken ta responsabel pa e cuido y mantencion posterior, y e costonan mensual y anual proyecta pa cada mata.

Garantia y transparencia: Finalmente, ta solicita informacion riba si tin garantia di sobrevivencia den e contractnan, si ta existi un registro central di siguimento y un presupuesto total y detaya di e programa.

Parlamentario Shailiny Tromp-Lee a enfatisa cu un programa di e magnitud aki ta un compromiso di varios aña y cu e resultado final mester bira visibel den un Aruba cu mas mata/palo, mas fresco y cu espacionan publico cuida. “Transparencia y dunamento di cuenta ta esencial pa Parlamento por evalua e progreso di e programa y pa pueblo por conoce con e recurso publico ta wordo uza”, el a conclui, sperando e contestanan y documentacion completo dentro di e tempo acorda.