Sigur cu no tin otro… Organisacion criminal…?

Den e dianan aki Estadonan Uni ta den un debate candente, causa pa e di cuatro caso penal contra ex-presidente Trump, den cual a bin dilanti un aspecto interesante, tambe pa nos situacion. Ta trata di e ley pa castiga esnan cu a participa na un organisacion cu e meta pa comete crimen, cu a bira conoci pa e siglanan ‘RICO’ (Racketeer Influenced and Corrupt Organizations Act), cu a ser usa den varios caso di persecucion penal di mafia y gang relaciona cu narcotrafico. Sin embargo, e mesun criterionan por usa tambe den otro caso unda ta trata di un conspiracion pa comete crimen. Den e caso contra e ex-presidente y esnan den su circulo di (ex-)empleado y asesornan, fiscal na Georgia ta usa e ley aki pa persigui penalmente e grupo di persona aki, pa a organiza un intento pa crea un resultado falsifica di e eleccion presidencial na e estado aki, y tambe na varios otro estado, pa presenta un resultado final faborable pa Trump. E intento a fracasa, a pesar di e ataque riba Capitolio dia 6 di januari 2021, dia cu Congreso a reuni pa certifica e resultado oficialmente.

E caso aki, mescos e otronan contra Trump, por tuma bastante tempo pa cana nan curso, y no ta nos intencion pa bay specula encuanto e resultado final. Loke si a yama nos atencion, tabata e pregunta, con ta para cerca nos cu e tipo di crimen aki, acaso nos tin legislacion pa atende esaki? E contesta ta cu en berdad nos tin regla legal contra esaki, pero no hinca den un ley separa, sino inclui den nos Codigo Penal (Wetboek van Strafrecht). Articulo 2:79 1 ta bisa: “Participacion na un organisacion cu tin e obhetivo pa comete delito, ta ser castiga cu un castigo di prison di maximo ocho aña o un multa di e di cinco categoria.” Den inciso 3 di e mesun articulo aki ta bisa ademas: ”Encuanto e fundador, lider o dirigentenan di un organisacion manera referi den inciso 1, ta aumenta e castigonan di prison pa e hechonan estableci, cu un tercio.” Inciso 4 ta añadi: “Bao di participacion manera describi den inciso 1, ta comprende tambe duna apoyo financiero o material na, como tambe e recaudacion di placa o reclutamento di persona pa e organisacion describi aya (den inciso 1; red.).”

Riba su mes no ta straño cu nos tin ley pa e tipo di caso aki y cu den pasado a haci uso di esaki den casonan cu tabata trata di delincuente comun, cu tabata opera mas tanto riba tereno di narcotrafico. Sin embargo, den ultimo 10 aña nos a mira tres caso grandi surgi, unda den cada un nos ta mira un (ex-)ministro como e cabezante di e organisacion criminal, cu ta menciona explicitamente como parti di e delito(nan) cometi. Un di nan ta sintando su castigo caba, un por cierto ta bolbe den corte na luna di september pa trata e apelacion dilanti Hof, y den e ultimo caso (Flamingo) no tin caso treci pa corte ainda.

Awor, nos por haya e siguiente pregunta, cual ta: “Y kico ta asina importante pa conta nos, si nos sa tur esaki caba?” E contesta lo ta cu, pa cuminza, nos a bay como comunidad den un actitud di aparente aceptacion di e realidad aki como un hecho, sin cu tin un debate con ta bay preveni e cosnan aki di sucede. Y dos, no tur asunto a keda drecha riba e terenonan di gobernacion unda e crimennan a tuma lugar. Nos ta sinta warda pa e siguiente calamidad den esaki? Nos por duna un ehemplo.

Un suma total di varios miyon florin a cruza mesa den ultimo añanan, a base di e asina yama ‘maatschappelijke bijdrage’ cu un empresa o persona mester paga na un fundacion o asociacion, como ‘obra caritativo’, si no nan no ta haya e tereno comercial ‘erfpacht’ cu nan a pidi. Tur esey ta mustra masha bunita, pa “compensa e perdida cu e pais ta sufri pa sacrifica tereno scars.” Kico ta e problema anto? Cu segun nos opinion, no tin un base legal pa un ministro indica y ordena e compania cual organisacion ta esun cu e mester beneficia y cuanto e suma mester ta. Di tur e fluho di miyones aki, parlamento no ta mira nada pasobra e no ta aparece den ningun presupuesto. E unico cu a yega di entrega un lista di e organisacionnan beneficia, ta e ex-ministro involucra den caso Flamingo. Nos a mira e lista, di menos di dos aña, cu tabata contene un suma total di mas di cuatro miyon florin…

Anto awor e posible ‘organisacion criminal’. Como cu no tin ningun control administrativo di e sumanan aki, ta facil pa imagina cu por pone presion riba un organisacion pa nan acepta donacion, cu e condicion cu parti di e placa mester keda pasa pa un cuenta ‘X’ di persona ‘Y’… E punto no ta si nos por proba cu tin corupcion; e punto clave ta cu ningun hende por garantiza cu NO tin corupcion pasobra henter e fluho di miyones aki ta tuma lugar den completo scuridad. Un di Aruba su mihor huristanan a yama henter e modelo aki ‘pseudo-legale afpersing’ unda ministro, cu ta faculta solamente pa aproba y cobra erfpacht, ta duna inicio na un posible cadena di corupcion, den e mihor estilo di regimen di Juan Perón na Argentina. Aparentemente nos politiconan no kier siña, pero ta keda yora malay ora barco pega, atrobe…