Silencio total di presidente Medina den scandal di Odebrecht

Presidente Dominicano Danilo Medina ta mantene un silencio absoluto den e scandal di soborno di Odebrecht, un di e casonan mas grave di corupcion cu ta envolve varios dirigente di su partido.  Un partido cu ta den poder pa mas di 13 aña. E acusacionnan aki ta supuestamente un golpi pa gobierno di Medina.

Medina no a bisa nada tocante e topico aki desde dia 29 di mei, unda e ministro Dominicano di Industria y Comercio Temistocles Montas, a ser deteni hunto cu otro nuebe politico y empresario,  pa supuesto relacion cu soborno di e empresa di Brasil Odebrecht, cu  a paga hopi placa  pa asina purba haya e concesion di algun obra publico grandi na Republica Dominicana. Medina a cuminsa su di dos mandato na augustus di aña pasa,  despues cu el a logra su reeleccion. Den ultimo siman presidente Medina ta den un silencio tocante e topico aki y el a reduci tambe su aparicion den publico na Republica Dominicana.

E actitud di presidente Medina a motiva hopi critica di hopi partido di oposicion.

Montas a pone su posicion di ministro na disposicion di presidente Medina. E lo drenta prizon di Najayo cu 6 acusado mas, despues cu e hues Dominicano  a dicta diaranson un sentencia cu ta inclui prizon preventivo pa tur di nan.

Te na e momento aki, Medina tin  Montas den mesun posicion. Montas a traha den varios ministerio tempo cu partido di Liberacion Dominicano tabata goberna pa varios periodo. Montas ta tambe un miembro di comite politico di e agrupacion aki, aunke despues di su acusacion Medina a solicita e suspension temporal di Montas den posicion privilegia den organismo di direccion di partido di liberacion dominicano.

Montas lo cumpli 6 luna di prizon preventivo. Otro cuatro dirigente di e partido PLD a ser acusa tambe, entre nan tin dos senador y ex-ministro di obra publico, Víctor Díaz Rua.

Den e caso Odebrecht ta envolvi tambe e principal partido di oposicion manera ta Partido Revolucionario Moderno, pasobra su presidente Andres Bautista a haya un condena di 6 luna di prizon preventivo tambe.

Segun ministerio publico, e grupo di persona acusa  a logra acumula un fortuna miyonario durante ultimo añanan, supuestamente pa tur e sobornonan cu e empresario Angel Rondon, representante di Odebrecht na Republica Dominicana, a duna nan. Rondon ta acusa como e persona cu tabata distribui e placa.

E grupo di persona cu ta acusa a nenga acusacion y relacion cu e caso di Odebrecht durante tur audiencia. E acusacion cu tin riba nan ta pa delito di soborno, asociacion di delito, prevaricacion (funcionario publico cu no ta cumpli cu su deber of cu tin abuso di poder), desfalco (funcionario o empleado priva cu ta tuma placa den funcion di su posicion), enrikecimento ilicito y labamento di placa.

 

You May Also Like

Informe a revela: crisis a haci mas di 12 mil Venezolano huy pa Brasil

Crisis economico y social na Venezuela a impulsa mas di 12 mil persona pa ...

Insel Corsou ya caba den proceso pa bay failliet

Insel Corsou 6 siman pasa ya caba a cuminsa un procedura pa por declara ...

Rio de Janeiro tin shete morto violento pa dia

Rio de Janeiro – Desde 2002 te awe, shete persona, como promedio, ta muri ...

Brasil: Colombia y Brasil ta uni esfuerso pa atende refugiado Venezolano

(ElNacional) – Brasil y Colombia a anuncia diaranson pasa cu nan lo fortifica e ...

Fiscalia di Honduras a habri un investigacion pa 4 morto den final di futbol

Un multitud di fanatico a purba drenta na Stadion Nacional di Honduras,  pa asina ...

Peru: Nicolas Maduro no ta bonbini na Cumbre de las Americas

(Infobae/) – Gobierno di Peru a bisa cu presidente Maduro ‘no lo ta bonbini’ ...