Siman di turbulencia so

Awor caba esaki ta un siman pa keda corda. Rond di nos tur cos ta parce na candela, mientras cu aki na Aruba tambe nos ta pasando den cosnan nunca bisto.

E caso di turbulencia na nos hermana isla no a caba ainda, pero a bin mas claridad ki rumbo e asunto por bay. Manera nos editorial a splica na inicio di e siman aki, e mayoria parlamentario cu ta sostene gobierno interino, a haya ‘nul op het request’ na Corte Europeo. No ta ni sikiera tuma e caso den tratamento, pasobra e articulo cu nan ta pretende di uza, no ta aplicabel. E mayoria menciona a cuminsa mengua, pasobra den curso di ayera e persona cu a sirbi como formado y tambe ministro di Trafico, Transporte y Planificacion Urbano, Rudmilda Larmonie, a ‘jump ship’, entregando su retiro, en vista di un inminente Maatregel van Rijksbestuur cu casi sigur lo ser aproba pa Conseho di Ministro di Reino den curso di awe.

E motibo pa aproba e medida grandi ta cu no lo tin confiansa cu e grupo na poder lo cumpli cu e tarea di organisa eleccion na april. Cualkier momento por spera tur tipo di sabotahe di e hendenan aki. Di otro banda, un intervencion di Reino no lo ta ocasiona fiesta popular na e isla, por lo menos no pa esunnan cu ta apoya nan. E riesgo pa disturbio ta keda presente.

Na nos bisiña grandi e situacion ta mas grave ainda. Presidente Maduro a caba di confirma cu e pais no tin nada mas di un democracia parlamentario, ni di democracia di cualkier tipo. Cu e anulacion di e poder legislativo, den man di un mayoria anti-Chavista desde december 2015, y e posibilidad di enhuiciamento militar pa parlamentario, considerando nan actonan traicion, a yega finalmente na e situacion, unda ta obvio cu e unico manera cu e regimen aki ta bay entrega poder ta atraves di violencia. Pero, oposicion politico no ta prepara ni dispuesto pa haci esey. No ta recomendabel tampoco, pasobra ningun hende cu sano huicio lo kier pensa riba e consecuencianan di e opcion aki.

Pero esey no ta tur. E Chavistanan por wel di tin e poder arma den nan man, pero e situacion di desabastecimento ta afectando tur hende. No tin cuminda, ni medicamento suficiente, hasta combustibel a bira un problema, cu ta menasa di paralisa economia, loke a resta di esaki, en todo caso. Y asina e probabilidad ta aumentando cu no tin manera pa mantene orden publico mas y lo por tin un derumbe di e regimen. E consecuencianan lo ta grandi y por costa hopi bida tambe. Nos por a observa algun tempo atras cu tabatin sakeo na cierto parti di e pais, unda e forsanan arma, polis y ehercito, ta para trankil observando, consciente di e riesgonan cu nan ta core ora nan bay interveni contra un multitud rabia y hambra. Es mas, tabatin polis cu tambe tabata participa den e sakeo. Esey tabata djis un muestra di kico por sucede na momento cu e armanan tampoco por garantisa orden mas y tur cos colapse.

Y cerca nos, ta parce cu nos problemanan ta relativamente chikito compara cu e situacionnan ya describi. Despues di Odebrecht y Petrobras, y 11.000 miyon dollar horta na PDVSA so caba, esun ministro cu ta mira posibel fin di su carera su dilanti, ta parce algo futil. Pero nos ta un isla chikito, y loke na nivel regional o mundial ta insignificativo, pa nos ta importante. E importancia no ta den e nivel di riesgo pa disturbio.

Aruba su poblacion ta consisti di hende mayoritariamente pacifico, pero den cierto aspecto nos ta bon di mas, y nos ta permiti cu nan no ta daña nos imagen so, pero na prome lugar ta daña nos bida. Aruba ta birando demasiado custumbra cu corupcion. Mayoria di nos ta tuma como un hecho caba cu bo no por bay simplemente na un oficina di gobierno, entrega bo papelnan y haya un contesta riba un termino razonabel. No, bo ta haya tur sorto di conseho pa bay na tal y tal cas, of oficina, anto pa basta placa nan ta ‘fix’ bo. Esun cu no tin e placa, y no kier pa principio, e ultimonan aki a bira scars si, tin mala suerte y ta keda sin haya nada.

Nos sistema a deteriora di tal manera, cu a bira normal cu hende ta bay na cas di mandatario pa haya cos regla, cu ta trabao regular di funcionario publico, y gratis! Asina nos ta mina nos pais y ta permiti cu nada no ta funciona normal mas. Y kico nos ministro presidente ta haci? E ta ‘lamenta’, e ta ‘tristo’ cu tur e cosnan cu e macambanan fastioso ta bin haci den su pais. Si, den ‘su’ pais, pasobra nos no ta reconoce loke ta pasa den e luga aki como di ‘nos’.

Un simpel pregunta: ken di nos den casi ocho aña a tende mita palabra di nos MP tocante e cosnan aki cu mester drecha? Awor cu suela ta manera habri bao su pia, kisas e ta cuminsa papia?