Pa e di cinco aña di “Siman di Lantamento di Mucha” Comision Vision Pedagogico conhuntamente cu algun mayor hoben a trece dilanti un serie di actividadnan cu nan ta bay haci den conexion cu Dia Internacional di Derechonan di Mucha pa asina ey pone enfasis riba derechonan di mucha y ademas e seis punto basico di con pa lanta un mucha.

Asina ey Jesseline Kelly PR di Departamento di Asunto Social a splica den un conferencia di prensa unda el a informa cu den un siman nan lo tin actividadnan positivo pa mayornan y nan yiu por participa.

“Semper nos ta papia y enfoca riba e problemanan pero e siman aki nos kier dedik’e na un caracter preventivo yena cu informacion educativo y hopi special pa nos muchanan”, el a bisa.

Esaki ta e di cinco aña cu Comision Vision Pedagogico ta promoviendo e seis punto basico cu ta e vision pedagogico di Aruba, banda di e comision aki tin un plataforma hopi mas grandi di aproximadamente 25 organisacion cu tambe ta carga e vision aki pa Aruba.

Nan di Comision Pedagogico, kier stimula esaki y para keto e aña aki pa medio di un siman unda cu nan tin un kalender yena cu actividadnan.

Di e seis puntonan basico con pa lanta un mucha ta lo siguiente:

Lanta bo yiu den un ambiente sigur y cu amor.

Apoyo positivo, guia y pasa tempo hunto.

Sea realistico.

Disciplina positivo.

Como mayor, corda cuida bo mes.

Busca sosten y ayudo na e diferente organisacionnan cu t’ey pa bo.

Cada organisacion cu tin e vision pedagogico lo ta organisando un actividad y lo promove un di e puntonan basico aki unda nan a invita comunidad di Aruba pa participa den dje sin ningun costo.

Loke nan ta desea ta pa e mamanan y e yiunan for di un edad hoben por ta wordo informa y educa cu e hermentnan necesario pa nan desaroyo personal, pero tambe pa nan mes na momento cu un muhe bira un mama nan por haci y pone den practica tur e informacion cu nan a ricibi, pa nan por ta miho ekipa.

Nan ta di acuerdo pa informacion aki yega mas riba tereno di enseñansa como parti di curriculum unda cu nan ta desea pa muchanan y hobennan den scol por ricibi lesnan cu ta stimula nan desaroyo personal y cu nan por ricibi hermentnan pa despues ora nan bira mayor nan ta miho prepara pa esaki.

E aña aki e actividadnan ta cuminsa dia 13 di november na Cas Tan Tin na Noord cu Fundacion Respeta mi for di 1pm te cu 5pm cu e actividad ‘Back to the Future”.

14 di november Telefon pa Hubentud ta presenta “Get the Message”na Gloria Cine Max.

15 di november Centro pa Hoben y Famia tin informacion pa empleadonan di Kooyman y nan yiunan cu “Bring Your Kids to Work Day” for di 9am pa 12pm y 2pm te cu 5pm, tambe lo ta pa publico.

16 di november na Neptaly Henriquez Park Tienda di Educacion ta bay presenta “Playful Parenting”.

17 di november Stichting Wit Gele Kruis lo tin e “Feria di Disciplina” na Club San Martin na Santa Cruz.

18 di november Telefon pa Hubentud ta bay ta e programa di TV “Nos Mainta” den cuadro di Derechonan di Mucha, tambe na Centro di Bario Playa Pabao for di 3pm te 8pm lo tin celebracion di Derechonan di Mucha y Fundacion pa Nos Muchanan ta bay ta na San Nicolas for di 6.30pm te cu 9pm cu “Self Care Fair”.

19 di november Pasa Pret cu Rotarac ta presenta “Feria pa Mucha” na Club Caquetio for di 12pm te cu 5pm, Ministerio di Husticia y Asuntonan Social ta bay ta na Plasa D’jiespies – Plasa Padu for di 3.30pm te cu 7pm cu e “Marcha pa nos Derechonan”.

20 di november Dia Internacional di Derechonan di Mucha, Telefon pa Hubentud lo presenta henter dia peliculanan tocante Derecho di Mucha na The Movies, Fundacion Sea Bunita Sea Bo Mes ta bay ta na Renaissance Convention for di 5pm te cu 8pm cu “Mi Mesun Heroe Musical Show” y GLW Foundation for di 10am te cu 2pm na Centro di Bario Tanki Leendert lo tin “Feed the Kids Day” y pa finalisa e dia, Parlamento Hubenil lo tin e “Debate Speaking Championship” na EPI College Zaal for di 3.30pm.

Na 2016 Aruba a forma un comision Vision Pedagogico cu e meta pa formula y promove e Vision Pedagogico di Aruba y desde 2018 Aruba a introduci e Siman di Lantamento di Mucha.

E comision aki ta consisti di 5 diferente organisacion: Fundacion Pa Nos Muchanan, Stg. Wit Gele Kruis Aruba, Fundacion Respeta Mi, Tienda di Educacion y Centro pa Hoben y Famia. E organisacionnan aki conhuntamente cu Fundacion ADRA y FADA ta forma parti di e Centro pa Hoben y Famia unda nan ta ofreciendo diferente servicionan ariba tereno di lantamento di mucha na e famianan di Aruba bou di un solo dak.