Pa via di aumento drastico di casonan di Covid-19 cu e variante Omicron a bin dilanti e pregunta si ta bon pa muchanan cuminsa scol mañan diahuebs mirando e situacion di casonan na e momentonan aki.
Na varios paisnan rond di mundo a cuminsa implementa lesnan online y tapaboca den e lesnan semi-presencial pa via di e variante Omicron na unda cu tin preocupacion pa un apertura di scolnan despues di vakantie di Pasco cu lo por aumenta e casonan ainda mas.
Manera Bon Dia Aruba a indica den edicion di ayera, DVG a informa na su reportero cu te momentonan aki apertura di scol ta bay door pa mañan 06 di januari manera a ser plania y cu no tabatin ningun cambio riba esaki.
Ayera den oranan di atardi Sindicato di Maestronan di Aruba (SIMAR) a manda un carta na minister di Enseñansa Endy Croes tocante e preocupacion cu veld di Enseñansa tin na e momentonan aki na unda casonan di Covid-19 ta surpasa e cifra di tres mil y vooral e dia di ayera cu DVG a reporta 1.028 caso nobo di e virus aki.
Josephine Albertus a señala cu pa SIMAR siguridad, bienestar y salud ta na prome luga, den e carta ta indica cu nan ta expresa nan preocupacion pa apertura di scolnan e dia di mañan 06 di januari y asina a pidi pa cuminsa duna lesnan na muchanan pa e di dos mita di aña escolar 2021-2022.
Awor cu tin un variante nobo di e pandemia global Covid-19 ta aumentando di manera lihe na Aruba, y su fin no ta conoci te ainda, tambe nan kier evita problemanan den e sector di enseñansa.
Den e carta tambe ta señala cu Gobierno di Aruba a tuma e medidanan necesario y a endurece e medidanan ey recientemente, sinembargo, nan ta mira cu muchanan, por ehemplo, no ta permiti pa drenta den supermercadonan. E preocupacion cu nan ta trece dilanti ta cu muchanan si mester bay scol mientras cu eynan e docentenan como alumnonan no ta protegi di riesgonan posibel.
Den e reciente medidanan tambe ta relaciona e number maximo di personanan permiti den restaurantnan, eventonan social y familiar y no ta impone restriccionnan na scolnan y tamaño di lokaalnan.
Par di dia pasa riba rednan social a indica cu cerca di 1.000 persona a meldziek AO na SVb, directiva di SIMAR tin e temor cu si docentenan ta bandona enseñansa nan lo por confronta cu falta di acceso y escasez de suplentenan di docente.
Pa via di esaki, directiva di SIMAR ta reitera su preocupacion ya cu nan kier evita cu siguridad, salud y bienestar di tur esunnan cu ta traha den area di educacion den general lo wordo comprometi.
Pa e motibo ey, directiva di SIMAR ta solicita na minister Croes pa garantisa cu lo tuma na cuenta e medidanan di manera responsabel, pa exclui e riesgonan y lo por mantene e calidad den enseñansa, nan ta duna importancia pa enseñansa lo mester continua ya cu ta prioridad pa e proximo periodo.
Door di e carta aki di SIMAR, Bon Dia Aruba a tuma contacto cu minister di Enseñansa Endy Croes pa asina haya un declaracion di su banda tocante e situacion aki y si nan a considera un reunion cu CrisisTeam pa asina informa comunidad si nan lo tuma den consideracion e preocupacion cu SIMAR y algun trahadonan den veld di enseñansa tin na e momentonan aki, minister Croes su PR a confirma na reportero di Bon Dia Aruba cu entre ayera atardi y awe e lo duna un declaracion riba esaki. Algun ora despues, den un comunicado di prensa, a indica cu a dicidi pa pospone apertura di scol te dia 10 di januari, pa ‘evita aglomeracion’ en bista cu ‘tin hopi docente, mayor y alumnonan den isolacion y cuarentena’.
Ta importante pa destaca cu na mei di aña 2020, dos luna despues cu Covid-19 a yega na Aruba minister di Enseñansa anterior Armando Rudy Lampe a dicidi conhuntamente cu Gobierno di Aruba pa no habri scolnan door di pandemia Covid-19 cu na e momento ey no tabata responsabel pa habri scolnan back y tabatin medidanan como toque de queda, sinembargo e casonan na e tempo ey no tabata igual cu na e momentonan aki, mas di 3.000.
Aruba a subi na nivel di hopi riesgo segun CDC
Di otro banda, ayera atardi USA Today a publica riba su website cu Centers for Disease Control (CDC) di Merca ta indica na ciudadanonan Mericano pa evita di biaha pa Aruba pa motibo cu tin nivel hopi halto pa casonan di Covid-19.
E clasificacion nobo “Nivel 4” ta nifica cu tin mas di 500 caso nobo pa cada 100.000 persona di e poblacion durante ultimo 28 dianan.
“Debi na situacion actual di Aruba, incluyendo biaheronan completamente vacuna lo por tin riesgo di haya y plama e variantenan di Covid-19”, segun loke CDC a anuncia den un aviso publica pa biahenan e dia di ayera.
Na final di november CDC y Departamento di Estado a enfatisa na ciudadanonan Mericano pa “reconsidera di biaha pa Aruba” debi na condicionnan di Covid-19 den e nacion Caribeño.
Den ultimo lunanan tambe nan a indica pa ciudadanonan evita di biaha pa Trinidad y Tobago y Cayman Island asina como tambe varios destino di Africa y Europa.
