Un di e delaster argumentonan contra energia renovable ta cu te awo, tur e baterianan ta basa riba Lithium. E mineral aki no ta barata, y por ta basta toxico. Tambe e baterianan di mas miho di Lithium tin un duracion (lifespan) di mas o menos 10 aña. Awo imagina cu por traha un bateria cu ta traha na nivel comparabel di Lithium, pero na mesun momento ta traha di Salo (Sodium)!

Wel esaki ta e tema di e columna aki. Nos lo discuti e revolucion andando den tecnologia di bateria y con Sodium-Ion Batteries por ta un game-changer berdadero pa full e sector di energia renovable.

Sodium-Ion Battery

Sodio ta e seis elemento mas abundante riba planeta. E ta den e crust di tera, den lama, den salo comun, practicamente na tur caminda, distribui igualmente rond mundo. No tin un solo pais cu por controla e suministro di Sodium manera China ta controla Lithium. Esaki ta e promesa di bateria di Sodio: mesun tecnologia di bateria, pero sin e dependencia geopolitico y sin e prijs cu ta baila.

Pa hopi aña, tabatin un solo problema grandi cu bateria di Sodio: nan no tabata warda asina tanto energia den e mesun espacio y peso cu Lithium. Pero un par di luna pasa esaki no ta e caso mas. Un compania Chines CATL, a anuncia cu nan tecnologia nobo di Sodium-Ion batteries a kibra e barera di 175 Wh/kg cu ta casi comparabel cu e bateria di mas miho di Lithium.

15.000 Ciclo: e revolucion ta den LCOE

Pero pa Aruba y e lector averahe, e cifra mas importante no ta densidad di energia, pero ta e cantidad di ciclo cu un bateria electrico lo por wanta, y aki e storia ta bira uno espectacular. Un bateria cualitativo basa riba Lithium por ta wanta mas o menos 10 aña, cual no ta malo, pero na mesun momento no ta super bon tampoco. Awo segun testnan elabora di e compania CATL, e bateria basa riba Sodium-Ion por wanta 10.000 pa 15.000 ciclo! Esaki kiermen den lenguahe normal cu e bateria aki lo por wanta 30 aña! Cual ta un cifra espectacular.

Aki e tecnologia ta bira uno masha interesante mes. Imagina un bateria pa cas ta costa 7.000 florin pero mester cambi’e cada 10 aña. Awo imagina un bateria di Sodium-Ion ta costa 8.500 pero ta wanta 30 aña. Esaki ta cambia completamente e manera di calcula costo. Hopi hende ta wak solamente e prijs cu nan ta paga dia cu nan cumpra e bateria. Pero e cifra cu ta conta di berdad ta e costo pa cada kilowatt-ora cu e bateria ta entrega durante henter su bida , loke expertonan ta yama e “levelized cost of storage”. Un bateria cu ta costa mescos pero ta dura tres bes mas largo ta, na final, ta casi tres bes mas barata pa cada kilowatt-ora cu e ta duna bo.

Na e momento aki e bateria mas barata di Lithium ta mas o menos ta $70 pa kWh, awo segun calculacionnan di CATL, nan tecnologia di Sodium-Ion por brinda bateria na un prijs di $19 pa kWh, den futuro hopi cercano. Si esaki por wordo cumpli, e lo ta un gamechanger completo pa e sector di bateria, pero tambe pa full e sector di energia renovable.

E pregunta no ta mas si e revolucion di bateria ta bini. E t’ey caba. E pregunta ta: kico Aruba ta bay haci cune?