Nos a yega na e temporada di tratamento di presupuesto y naturalmente esey ta bay acompaña pa e comentario custumbra di varios exponente politico. Lider di fraccion gubernamental a capta atencion cu su ponencia cu su gobierno ta cumpli: deficit dentro di norma y presupuesto na tempo.
Berdad cu – riba papel, cu gobierno a entrega – ta parce cu e deficit ta dentro di e norma di 0,5% di e GDP pa 2017. Nos ta bisa parce, pasobra tin otro opinion den esaki. Nos a comenta caba tocante opinion di Conseho Consultativo (Raad van Advies, RvA) cu ta cuestiona e presupuesto riba diferente aspecto. Tambe CAFT tabatin su critica den e nota preliminar cu nan a duna riba e presupuesto. Nos ta bay laga e detayenan un banda un rato pa papia riba e otro aspecto: presupuesto na tempo. Esey por considera un logro? Sigur cu si, pero no pasobra e partido na mando a logra esey riba su mes, manera e lider di fraccion ta pretende.
Den e protocol di 2 di april 2015 y cu tabatin e ley riba CAFT como consecuencia, a haci palabracion cu Hulanda cu Aruba lo mester bay traha pisa riba mehoracion di su administracion financiero, y cu si ta necesario Aruba lo haya apoyo profesional di Hulanda pa esaki. Nos no ta ni bay puntra con grandi e apoyo aki tabata, ta trata mas bien di e rosea cayente di Hulanda cu tabata t’ey henter ora. Naturalmente, nos ta contento cu a logra pa prome biaha pa presenta un presupuesto na tempo. Ey nos tur ta gana, independiente di e aprobacion o critica cu nos por tin pa su contenido.
Pero nos mester papia e cos manera cu e ta: pa añanan caba tin e capacidad profesional na e departamento pa percura pa un presupuesto ta cla na tempo. Ta e problemanan entre e ministronan ta haci cu no por keda cla na tempo! Y di e manera ey nos no tin ningun garantia cu e siguiente presupuesto ta keda cla na tempo; ban spera cu si.
E parti mas gracioso di e relato di e lider di fraccion ta unda e ta pretende cu e ‘logro’ grandi aki ta e caminda pa un deficit di cero na 2018, y hasta posiblemente un surplus chikito di 0,5% di GDP, anto “sin medida”. Un ‘medida’ cu gobierno a tuma, cu su parti positivo tambe, ta e reforma di e pension di ambtenaar, cu a crea un espacio grandi den presupuesto, cu gobierno a probecha pa laga e gastonan di salario sigui core: no mester kita hende di trabao, ‘everybody happy’! Esey ta e critica tambe di varios banda cu structuralmente gobierno no ta haci nada pa mehora su administracion financiero.
Di e otro medidanan nos ta menciona algun so, cu a spaar placa pa gobierno y a costa e ciudadano basta entrada: e ampliacion di BBO den forma di BAZV, bahando e suma di contribucion di gobierno na AZV cu un suma considerabel, placa cu gobierno a uza pa cubri otro gasto. A pesar di e entrada grandi di BAZV (121 miyon na 2016 y 128 miyon na 2017) ta anticipa cu gobierno su contribucion obligatorio ta sigui crece pasobra e gastonan total di AZV ta sigui crece: na 2017 AZV ta surpasa e marca di 400 miyon florin pa prome biaha, a pesar cu nos lo ta poniendo 242 miyon florin na prima y BAZV. Asina por mira cu nos no ta haya nada regala, ta nos mes ta paga tur cos.
Otro di e ‘medidanan’ tabata
