Ayera mainta sindicato di brandweer(SINBA) a tene un reunion general cu nan miembronan na post Oscar (Sabana Berde).
Presidente di SINBA, David Roza a expresa na Bon Dia Aruba cu nan miembronan ta malcontento y nan no ta descarta di bay den accion, pero den forma responsabel.
Nan a traha un carta pa Gobernador, Gobierno y Parlamento cu un lista largo di problema y situacion cu nan ta confronta constantemente pa realisa nan trabao. Roza a bisa cu tin cos cu a yega, pero no completo den cuerpo di bombero. Mientras cu den nan reunion general nan a trata 24 punto cu mester di atencion, entre nan: bevordering pendiente, centraale post duct nan sushi, auto spuitnan de mal estado y nan no ta gekeur y logicamente nan no ta apto pa ta riba caminda. Ya caba nan a yega di confronta situacion di peliger debi na e mal condicion di e truck.
Tambe nan ta haya necesario pa bin cu un post na Santa Cruz, etc… Pero tambe nan ta pidi investigacion di financieel beheer den cuerpo. Roza a bisa cu a pesar cu nan a reunion cu minister di Husticia, nan no ta mira mehoracion substancial, y dia pa dia e disgusto ta bira mas grandi.
Presidente di SINBA a agrega cu minister Bikker tin un cantidad di carta cu nan a yega di entrega. Solamente e luna aki nan a yega di entrege 5 carta, unda nan ta expresa nan disgusto y nan problemanan, pero nan no a wordo atendi debidamente.
Den e reunion di ayera mainta nan a pidi minister pa atende cuater punto primordial. Un di nan ta pa aeropuerto hisa bezetting bek na 9 personal direct, manera e tabata semper. Pasobra aworaki ta na cuater. El a splica cu debi cu un grupo grandi di nan coleganan a haya Covid, mester a baha e cantidad na cuater anochi, y e bashi di nuebe a wordo yena cu overtime. Pero aworaki nan a bah’e na 4 y el a keda asina. Mientras cu nan tin auto spuit y materiaalwagen mester sali cu mas hende.
Punto di agenda
E puntonan cu a wordo trata den e reunion general tabata como lo siguiente:
• Desaroyo nan interno cu no ta bon
• Bevordering pendiente pa adresa 19 personal desde 2014
• Bevordering 2 colega mas cu 5 aña pendiente sin resultado
• Centraale post duct nan sushi te cu awe october 2020
• Blus kleding nan no a yega completo
• Auto spuit nan den mal estado
• Stoel nan cu ser recogi, mester saca nan bek poni den lokaal pa mas colega por sinta
• Nan a pidi minister trek in tur decisionnan tuma contra tur paz laboral pa cu nos coleganan
• Werktenue no ta completo,werkboek, petten, riem ainda falta
• Beleid plan 2013 te cu 2020 awe october no tin
• Rapport di SVB di edificionan den mal estado(Tanki Flip y San Nicolas) y Sabana Berde
• Resultado post Santa Cruz
• Investigacion di Financieel Beheer den cuerpo
• Investigacion automatisering den cuerpo
• Primordial hisa Bezetting bek na 9 personal na airport direct
• Carta di Sr Vrolijk ( D.O.W), carta di (Commandant), carta doorlicht ( sr Jaime Lacle ) 2020, tur cu a wordo manda pa Minister di Husticia den luna september 2020
• Aangesloten bon maaltijd te cu awe sin resultado
• Mal contento di no a laga auto spuit cu personal bay entiero di colega nan famia
• 6 Bevelvoerders cu no por traha mas na post Oscar (trek in)
• Miembro nan a firma contra mal maneho den cuerpo 2012,2013, mei 2020
• Ademluchttoestel compleet desde 2004 (Shinishi), boternan desde 1993 (Geel)
• Gevarenpremie desde 2011/ ultimo carta 2013
Despues di e reunion general di sindicato SINBA cu su miembronan nan a dicidi di bay te bestuurskantoor, ya cu e 24 puntonan cu a wordo treci dilanti, nan no tabata contento cune. Nan no a wak resultado cu e reunion previo cu ann tabatin diahuebs cu minister di Husticia, Andin Bikker. Ayera nan a dicidi bay cerca e mantario, pero e biaha aki den bloke, prome cu nan ta bay den accion, asina Roza a bisa.
E lider sindical di brandweer a laga sa cu a pesar di e malcontento cu ta existi cerca personal di brandweer, nan no kier bay den accion ainda, teniendo na cuenta e situacion cu nos comunidad ta pasando aden. “Nan no kier drenta den accion ainda pa mustra Aruba cu nos ta cu nan,” asina presidente di SINBA a declara.
