Sindicato ABV: “Nos ta perdiendo hopi experiencia”

Gina Maduro, ABV

Awe ta Dia Mundial di Enfermeria, y president di e sindicato ABV, Gina Maduro cu ta representa e trahadonan di e sector di cuido den hospital, ta informa Bon Dia Aruba cu tin scarsedad di enfermero y na Aruba tin poco interes pe trabou bou di hoben.

E ta enfatisa cu e fecha aki ta un dia cu nan tur ta recorda nan enfermeronan. “Nos ta para un rato keto y sinta analisa kico enfermero  ta actualmente.” Segun sra. Maduro e reto di e trahadonan di enfermeria ta grandi, ya cu cada dia e ta exigi mas. E pashent di awendia ta mas complica ya cu nos ta wordo menasa pa hopi malesa complica y cu ta exigi mas di e cuido. Tambe e ta exigi mas personal den cama di e pashent.

Igualmente hospital ta den transformacion no solamente di su infrastructura of edificio sino internamente riba e servicio cu ta wordo brinda na e pashentnan. E sindicalista a señala cu hopi cambio positivo ta tumando luga cu sistema moderno di digitalisacion. Tambe tin e departamento di educacion di cu diferente curso specialisa.

Scarsedad di enfermeronan
Sindicato ABV ta hopi contento cu e logronan aki pasobra nan a boga hopi aña pa esey. Sinembargo hospital tin un scarsedad di enfermero actualmente. Un di e motibonan ta cu hopi di nan a baha cu pension y otronan ta bayendo. “Nos ta perdiendo hopi experiencia na cantidad”,  sra. Maduro a bisa.

Nan ta zorg pa e experiencia no bay perdi, pasobra ta dificil pa haya hobennan interesa riba trabou di enfermeria. Te ainda  hospital tin mester di busca enfermeronan di afo specialmente di Hulanda, Surinam, etc.. ya cu na Aruba no tin suficiente trahado den enfermeria.

Presidente di ABV ta kere cu mester percura pa e trabou aki por bira mas yamativo, pa asina stimula nos hendenan, specialmente e hobennan di nos pa bay mas den scol, y asina drenta den e bunita trabou di enfermeria cu no ta uno facil.

“E trabou di enfermeria ta exigi hopi di bo como hende y como trahado. E ta un trabou cu mentalmente bo ta bezig.” E ta bisa cu e pashent ta bin cerca nan pa ayudo y nan tin cu dun’e ayudo manera e mester ta.

E plan
Sra. Maduro mes cu ta traha den e departamento di Emergencia ta considera importante pa ta bon prepara, ya cu e camanan dedica na emergencia lo bira mas. Pero e ta haya cu nan mester wak di ki forma nan ta bay sigui traha, y si nan tin suficiente trahado pa cuida tur e pashent pasobra e demanda di pashentnan ta altisimo.

E sindicalista  a bisa cu nan tambe kier wak e plan traha pa e comision di supervision di Horacio Oduber Hospital (HOH). E plan aki mester wordo ehecuta door di hunta directiva, y logicamente sindicato tambe mester ta envolvi den e plan pa yena e vacaturanan cu ta existi den enfermeria na HOH.

“Nos tambe kier wak e plan ariba mesa y wak con  nos ta bay over di un hospital pa un nobo. Y pa wak si nos ta cumpli cu tur e retonan y exigencianan cu nan ta spera for di nos.”

E ta agrega cu e pashent tin derecho di un cuido adecua y nan como trahado di hospital tin cu duna e cuido “lo maximo cu bo tin”. Pero pa haci’e  posibel mester tin e manpower, ya cu e trahadonan actual den enfermeria ta haciendo tur loke ta posibel di nan parti. Pero e ta haya cu di parti di hospital mester pone suficiente personal, material y sistema.  Finalmente e sindicalista Maduro ta reconoce cu hospital ta trahando riba dje ya cu tin hopi desaroyo cu ta tumando luga actualmente.

 

 

You May Also Like

SC20160113-151909-1.jpg

Veredicto ta mustra abuso di poder di banda di gobierno

Gobierno y e compania Zissu Properties (boutique hotel Ocean Z) a perde caso contra ...

Varios arma di candela, droga y placa confisca na Saliña Cerca despues di entrada hudicial

Afpakteam a tene un accion grandi conhuntamente cu Marechaussee (Kmar) y Ministerio Publico di ...

expo fotografia dia prensa.JPG

Director di RBC Bank a resalta importancia di libertad di prensa na Aruba

E aña  aki pa di nuebe añanan consecutivo, e miembro di prensa, sr. Leo ...

Turismo a cay cu 15% pa prome kwartaal

Durante e prome kwartaal di 2017, Aruba Tourism Authority a reporta cu tabatin un ...

25 di augustus tin referendum di trahadonan di TeleAruba

Aunke gerencia di TeleAruba no a reconoce di biaha FTA como e sindicato di ...