Sindicato di Maestro di Aruba (SIMAR): “Enseñansa mester sigui, pero na un manera responsabel”

Sindicato di Maestro di Aruba a ofrece un relato di e situacion di area di enseñansa durante e pandemia Covid-19, na unda a trece dilanti varios punto pa loke ta trata habrimento di scol.

Despues cu crisis team a anuncia cu dia 20 di augustus lo cuminsa e aña escolar 2020-2021, cu pa via di aumentonan di caso di Covid-19 a wordo posponi pa 3 di september, Simar a crea un meldlijn pa maestronan cu tin algun preocupacion of informacion cu nan kier duna di conoce.

Josephine Albertus, presidente di e sindicato, a bisa cu e linea aki a haya hopi yamada di maestronan preocupa pa loke tabata trata habrimento di scol, principalmente enfoca riba nan siguridad. Despues cu a haya hopi mensahe y yamada, Albertus a sigura cu di e manera aki nan por inventarisa tur cos pa asina wak con nan por yuda.

“Tur e preocupacion y informacion cu nos haya den e meldlinjn a haya un atencion primordial y nos a hib’e na e reunionnan” el a señala.

Ademas, el a menciona cu siman pasa nan a haya diferente reunion cu Crisis Team, Departamento di Enseñansa y diferente directiva di scol. Tambe el a comenta cu e siman aki nan lo duna un charla cu topiconan cu a wordo treci dilanti den e meldlijn, por ehempel, base di enseñansa actual, retonan de enseñansa actual y e pregunta principal si scolnan por habri dia 3 di september.

Riba e prome parti, cu ta trata base di enseñansa actual, Albertus a splica cu tin 1.500 personal di enseñansa, 1.500 persona di enseñansa di apoyo, e averahe di alumno ta di 23.000 parti den enseñansa primario, secundario, avansa y tur. Tur e personanan aki ta traha den 85 scol, y ta wordo dividi den 12 directiva di scol.

Pa loke ta trata e parti di retonan di enseñansa actual, Albertus a comenta cu door di e situacion di Covid-19 ora cu scolnan mester a cera, nan a haci loke Gobierno di Aruba a bisa cu mester, tuma medidanan di precaucion, prevencion y siguridad.

Pa esaki, algun specialistanan a traha un protocol cu scolnan mester sigui, algo cu el a enfatisa e pregunta tocante si esaki ta realistico pa e enseñansa actual, pa motibo cu tin hopi scol cu no ta adapta pa e protocol desde prome cu e crisis a cuminsa.

Den e crisis aki, Albertus a declara cu e problemanan ta resalta pa loke nan a inventarisa tres parti cu ta mas importante den siguridad actual pa e maestronan y alumnonan. E prome ta trata di infrastructura. El a expresa cu hopi scol no ta bon pa sigui e protocol. Ta wordo bisa cu mester tin distancia social, mester laba man frecuentemente y tuma na cuenta e parti di ventilacion.

Ora ta wak e parti aki, di hopi scol e lokaalnan ta chikito cu no por sigui e parti di distancia social, hopi scol no tin labamano of algun di nan no ta traha. Albertus a comenta cu e parti mas importante ta esun di ventilacion, na unda cierto scolnan e bentananan no ta habri y e ora ey e lokaal no por tin un ventilacion optimal.

Den e parti di material higienico, pa loke ta trata e parti di mondmask, el a señala cu tin hopi modelo di nan den circulacion cu no ta sigurando e salud y bienestar, algo cu e ta haya cu no por permiti.

“Bo dunado di trabou ta responsabel pa bo ta sigur na bo trabou”, Albertus a bisa.

Tocante material di enseñansa, el a expresa cu hopi fondonan di scol a bay atras, loke ta nifica cu no tin placa pa hopi cos. Y aworaki tin e situacion cu tin mucha cu tin e aparato pa bay di manera online y otronan no tin esey.

Albertus a trece dilanti cu como maestronan, hopi trahado publico y priva a entrega un parti di su salario como ‘solidaridad’, como tambe tin hende cu a perde nan trabou. “Nos ta compronde e situacion, pero nos tin cu corda riba nos mes tambe ora di bay traha”.

Si tur scol ta cla pa habri dia 3 di september, Simar ta bisa cu nan tin e responsabilidad pa wak pa enseñansa. Pa motibo cu prome a wordo bisa cu scolnan lo habri 20 di augustus y despues a posponi pa dia 3 di september pa via di e desaroyo cu e virus tin actualmente na Aruba.

“Nos como Simar ta compronde cu enseñansa ta importante, cu muchanan a haya retraso pa via di e cantidad di dianan sin scol y cu e mucha tin cu haya enseñansa. Pero e tin cu bay di un manera responsabel, docente no por hinca nan mes den peliger pasobra enseñansa tin cu sigui”, Albertus a manifesta.

Tambe mester recorda riba e parti psicologico di maestronan, cu algun di nan tin familiarnan cu a haya e virus y nan tin miedo di bay scol. Loke nan tambe a trece dilanti den e reunion ta cu scolnan tin e deber pa wak con nan por trece un solucion riba e parti emocional di e maestro.

Den e reunion, Simar tambe a presenta algun recomendacionnan mirando e desaroyo di Covid-19 na Aruba. Den un di nan ta recomenda pa habri scol na 50 %, na unda e muchanan por bay scol cu distanciamento y tambe nan por haya lesnan digital.

Pa finalisa, Albertus a sigura cu lo kier garantisa salud, bienestar y siguridad na prome luga pa enseñansa por sigui cana, “enseñansa mester sigui pero e mester bay na un manera responsabel”.