Como un echo positivo, presidente di sindicato di trahadonan di refineria IOWA, sr. Boy Anthony ta haya e anuncio cu refineria na San Nicolas lo habri bek.
E sindicalista a bisa cu apesar cu e refineria a stop su operacion casi cuater aña pasa, nan a keda mantene bibo e sindicato. Nan tabata antes 320 pa 340 miembro y actualmente el a mantene e sindicato ariba cu 51 miembro.
“Ora cu e refineria a cera mi a wanta e sindicato ariba su mes. Nos a keda afilia na USW (The United Steelworkers Union) cu ta e sindicato di Merca”, el a bisa. E sindicato USW ta representa 800 pa 900 mil trahado di refineria na Merca.
E sindicalista a bisa cu sindicato IOWUA a abstene di bay den media di comunicacion pa vocifera nan opinion ya cu e proceso di negociacion tabata tumando luga. Pero aworaki cu gobierno a anuncia oficialmente cu lo tin reapertura di refineria y cu pronto lo firma un acuerdo final cu Citgo, e ta haya prudente pa trece su opinion.
Sinta na mesa
El a informa cu sindicato IOWUA tambe a wordo consulta y te hasta nan a sinta cu e top management pa wak con e proceso tabata bayendo. Tambe sr. Boy Anthony a yega di tuma contact cu gobierno varios biaha pa IOWUA ta na altura con e negociacion tabata bayendo.
“Tanten cu bo ta negosha bo no por papia tur cos. Kiermen mi ta respeta e negociacion y mi sa cu no ta facil”, el a declara na Bon Dia Aruba.
E echo cu e refineria ta uno grandi e ta demanda un proceso di negociacion largo, pero e ta contento cu tur cos ta bayendo den bon direccion.
El a bisa cu nan tabatin un delaster reunion cu Valero. Prome nan a deal cu Valero cu si e refineria ta cuminsa opera bek aki tres aña, tur trahado ta haya bek nan beneficio y tur cos cu nan a laga. Pero e tres aña a pasa y IOWUA a deal cu Valero cu si e refineria mester habri bek, nan tin cu sinta na mesa pa discuti e puntonan bek.
E ta haya importante cu IOWUA ta afilia na USW di Merca cu tambe ta representa Citgo. E sindicalista a bisa cu IOWUA lo tin un copia di e acuerdo cu Citgo pa nan por tin un idea y asina nan ta prepara pa un eventual negociacion.
“Ami ta purba prepara mi mes mas miho cu ta posibel den e sentido di tin bon contacto cu San Antonio (Merca)…”, el a bisa. Igualmente e tin bon contacto cu e top management, pero tambe cu Mediador di Gobierno y cu Gobierno, ya cu e ta kere cu tur solucion na mesa bo ta haye.
Sindicato IOWUA
Sr. Boy Anthony a laga sa cu sindicato IOWUA ta bibo y activo y recientemente nan a yega di firma tres contracto colectivo (CAO) representando e trahadonan afilia. Nan a firma un CAO pa e trahadonan di e terminal di e refineria di tres aña. Tambe nan a yega di firma otro CAO pa tres aña pa e truck drivenan cu ta esunnan cu ta percura pa transporta y distribui e gasolin y diesel. Y e di tres CAO cu nan a firma pa tres aña ta esun di e trahadonan cu ta tanker e avionnan cu combustibel na aeropuerto.
“E negociacionnan a bay bon. Bo mes sa den e tempo dificil aki, no tabata facil pero nos a haya 9% den tres aña y un par di beneficio mas acerca”, sr. Anthony a bisa. El ta contento cu e negociacion di e tres CAO aki a bay den bon ambiente, ya cu no a presenta niun conflicto cu e compania.
Mirando cu un gran parti di e trahadonan di e refineria a bay afo ora cu Valero a stop su operacion, sr. Anthony a indica cu IOWUA a sigui mantene cierto contacto cu e trahadonan aki. Igualmente nan tin contact cu Recurso Humano (HR) di Valero cu tin tur informacion di e trahadonan. “Mi ta kere cu na momento cu e acuerdo ta bira oficial cu tanto gobierno como Citgo, hunto nan ta bay check”, el a declara.
E sindicalista a laga sa cu e ta bay check pa tur esunnan cu a traha den refineria Valero na San Nicolas y cu a bay y cu kier bin bek, e kier sa con lo bay ta para cu nan tambe. Considerando cu e refineria tin casi cuater aña cera e ta bay demanda hopi trahado pa start bek.
