Awe mainta pa 9or dilanti di warda di polis di playa, Sindicato di Polis Arubano (SPA) lo ta presente hunto cu su miembronan pa asina entrega un carta na Minister di Husticia Arthur Dowers pa pidi su intermediacion pa locual ta pasando den Cuerpo Policial, entre e personal y e Korps Chef.

Segun e presidente di SPA Edgard Maduro, nan intencion ta pa haci esaki na un forma pasivo. E ta splica cu despues cu nan entrega e carta, lo bandona e luga y tur hende lo sigui cu nan trabou manera mester ta. Bon Dia Aruba a puntra e presidente kico ta pasando y e ta splica cu despues di a reuni cu Korps Chef Dolfi Richardson riba puntonan di preocupacion cu e sindicato y su miembronan tin, nan ta sinti cu sr. Richardson a faltanan respet y esaki ta pone cu nan a perde confiansa den sr. Richardson.

Puntonan di preocupacion
Bon Dia Aruba a puntra sr. Maduro si e puntonan aki a bin despues di loke a pasa dialuna unda un miembro di cuerpo policial a perde su bida durante cu e ta eherce su trabou. E presidente di sindicato SPA ta bisa nos redaccion cu esaki tin algun tempo aki andando unda cu nan ta pida pa ‘upgrade’ e departamento. “Imagina bo cu tin hendenan cu tin añanan no a train con pa tira. Tin di nan cu tin masha tempo sin haya training con pa boei un persona den diferente situacion. No ta placa nos ta pidiendo sino un ‘upgrading’ di e departamento pa asina nos duna un miho servicio na comunidad.”

Sr. Maduro ta splica cu despues di hopi tempo bo por sinti un union atrobe den miembronan di e sindicato. E la splica na Bon Dia Aruba cu den nan ultimo reunion tabata tin mas o menos 140 miembro presente y pa nan esaki ta un stap grandi cu nan a bay padilanti.

“No ta placa nos ta pidiendo sino un ‘upgrading’ di e departamento pa asina nos duna un miho servicio na comunidad.”

Falta di Respet
A puntra Sr. Maduro kico ta e motibo cu nan ta sinti cu respet a wordo falta na nan y e ta bisa, “Nos a bay na un manera pasivo pa pidi mas envolvimento di e sindicato den reunionnan di polis. “Na banda di grita nos na un forma no adecua, segun e Korps Chef nos no ta riba su nivel.” Bon Dia Aruba lo ta buscando e otro banda di medaya di Sr. Richardson, aunke pa hopi tempo caba sr. Richardson no ta duna oido na yamadanan di nos redaccion.

Den e ultimo reaccion pa Bon Dia, sr. Maduro ta bisa cu nan meta ta pa pidi e minister concerni pa intermedia pa wak si nan por sali di e situacion aki na un manera serio. Locual e sindicato y su miembronan kier ta pa nan por sinta papia riba e puntonan di preocupacion y busca solucion pa esaki. Sr. Maduro a duna di conoce cu nan lo kier sinta cu e minister mas lihe cu ta posibel pero ta prefera di warda pa e entiero di nan colega pasa, brindando asina un respet na dje y despues lo kier un reunion mas lihe cu ta posibel cu e mandatario.